Ikinatuwa ng netizens at mga kaibigan ni Megan Young ang video kung saan makikita ang tila pagpuntirya niya sa bridal bouquet na inihagis ni Maxene Magalona sa reception ng kasal nila ni Robby Mananquil.
Ikinasal sina Maxene at Robby sa Shangri-La Resort and Spa, sa Boracay, noong Huwebes, January 11.
Sa nasabing video na in-upload ni Megan sa Instagram, kitang-kita ang agresibong pagtalon ng Miss World 2013 upang saluhin ang bridal bouquet.
“Mikael” naman ang sigaw ng mga bisita sa reception ng kasalan nang makita ang eksenang ito.
Ang tinutukoy na "Mikael" ng mga bisita ay ang Kapuso actor-TV host na si Mikael Daez, boyfriend ni Megan.
Pitong taon na ang relasyon nina Megan at Mikael, kaya inaasahang ang dalawa na ang susunod na ikakasal.
Si Mikael din ang nakakuha ng garter mula sa groom, kaya lalong umugong ang usaping lalagay na sa tahimik ang dalawa.
Pinaniniwalaang ang sinumang makakuha ng bridal bouquet at garter sa isang kasalan ay ang susunod na ikakasal.