Naiilang at umiiwas si Carlo Aquino nang tanungin kung sila pa rin ng kanyang non-showbiz girlfriend na si Kristine Nieto.
Nakapanayam ng PEP.ph (Philippine Entertainment Portal) at ilang online reporters si Carlo noong Huwebes, January 11, para sa upcoming movie nila ni Bela Padilla na Meet Me in St. Gallen.
Habang pinag-uusapan ang pakikipagrelasyon, hindi naiwasang kumustahin si Carlo at ang longtime girlfriend niyang si Kristine.
Napatahimik saglit si Carlo bago niya sagutin, “Ano lang siguro, may inaayos.”
Sinabi ng reporters na gusto lang linawin ang estado ng kanilang relasyon para maayos itong maisulat.
Ngunit pakiusap ng Kapamilya actor, “Huwag na lang siguro nating isulat.”
Pagkatapos ay matipid pa niyang sinabi tungkol sa kanila ng girlfriend niya, “Nag-uusap lang kami.”
Bago muling ibalik ang usapan sa pelikula, nakiusap si Carlo sa online entertainment reporters, “Puwede bang huwag nang pag-usapan.”
Halos ganito rin ang naging reaksiyon ng Kapamilya actor nang tanungin siya ng ABS-CBN writer na si Darla Sauler.
Naiilang niyang sinabi, “Okay naman, tinitingnan lang namin kung anong puwedeng mangyari.”
Sa nakaraang panayam ng PEP.ph kay Carlo, inamin niyang nagli-live in na sila ng kanyang girlfriend.
Ngunit tila wala pa sa plano ang pagpapakasal dahil, aniya, “Mag-iipon muna. Marami pa kaming plano.”