Inconsolable si Ruru Madrid sa biglaang pagkamatay kagabi sa Dipolog City ng kanyang mentor at manager, ang multi-awarded director na si Maryo J. delos Reyes.
Nag-post siya sa kanyang Instagram account ng litrato nilang dalawa, kasama na rin ang kanyang mensahe para sa yumaong direktor.
Isang malapit sa lead actor ang nagkuwento sa PEP.ph (Philippine Entertainment Portal) na iyak nang iyak si Ruru at hindi ito nakatulog nang malaman ang nangyari kay Direk Maryo.
Alas-singko na ng umaga nang makatulog si Ruru sa living room nila dahil hindi na niya nagawang pumasok pa sa kuwarto ng tahanan nila sa Marikina City.
“Ayaw na nga sana ni Ruru na mag-report sa Sunday Pinasaya.
“Gusto niya na lumipad sa Dipolog City para makita at mayakap niya si Direk Maryo,” pahayag ng PEP.ph source.
Huling nagkita sina Ruru at Direk Maryo sa Centennial Airport ng PAL noong Biyernes dahil papunta ang aktor sa Dinagyang Festival sa Iloilo City para mag-promote ng Sherlock Jr.
Dipolog-bound naman ang direktor para sa isang event na dadaluhan niya.
LAST WILL. Nang sumakabilang-buhay si Direk Maryo kagabi, saka naisip ng pamilya ni Ruru na nitong mga nakaraang araw ay tila abala ang premyadong direktor sa pag-aasikaso ng kanyang mga huling habilin para kay Ruru.
Tila pahiwatig daw ito ng pamamaalam ng direktor.
Dinalaw ni Ruru si Direk Maryo sa opisina nito noong nakaraang Miyerkules na hindi niya dati ginagawa.
Diumano, maraming bilin si Direk Maryo sa tatay ni Ruru nang magkausap ang dalawa.
Mahigpit daw ang bilin ni Direk Maryo sa ama ni Ruru na alagaan nitong mabuti ang aktor at ang career nito.
Nagtaka rin si Ruru dahil, sa kauna-unahang pagkakataon, dumalo si Direk Maryo sa presscon ng teleserye ng aktor, ang Sherlock Jr., noong January 22, na hindi ginawa ng manager niya sa mga press launch ng mga nakaraang programa ni Ruru sa GMA-7.
Sinabi rin ng PEP.ph source na kasalukuyang nasa Dipolog pa ang bangkay ni Direk Maryo, pero bumiyahe na roon si Lilybeth Rasonable, ang Senior Vice President for Entertainment ng GMA-7 na matalik na kaibigan ng namayapang direktor.
Si Rasonable ang mag-aasikaso sa pagdadala ng bangkay ni Direk Maryo sa Metro Manila.