Pumanaw na ang batikang aktres at manunulat na si Mely Tagasa ngayong Sabado ng madaling-araw, March 24, 2018.
Ito ay pagkatapos ng ilang araw na pagkaka-confine sa Cardinal Santos Medical Center.
Si Mely ay kilala sa kanyang pagganap bilang terror teacher na si Miss Tapia sa sitcom na Iskul Bukol, na umere mula 1977 hanggang 1990.
Ibinahagi ng anak ni Mely na si Gina Marissa Tagasa ang malungkot na balita sa kanyang personal Facebook account.
Sabi niya, "At 12:26 AM, our dearly beloved Miss Tapia has joined our Creator. The gates of heaven open for her. We love you very much, Ma!"
Noong Huwebes, March 22, ay ibinahagi ni Gina na na-comatose ang ina at tinanggal na ng mga doktor ang nakakabit na respirator nito.
Magdiriwang sana ng kanyang ika-83 na kaarawan si Mely sa April 16.
Ang huling public appearance ni Mely sa publiko ay nang personal niyang tinanggap ang kanyang Walk of Fame star noong November 2017.