Pinalagan ni Quezon City Second District Councilor Roderick Paulate ang panibagong reklamong inihain ng Office of the Ombudsman laban sa kanya ngayong Miyerkules, April 25.
Ayon sa ulat ng GMA News Online, graft and multiple counts of falsification charges ang inihain ng Ombudsman sa Sandiganbayan dahil sa umano’y 30 ghost employees na under sa payroll ng opisina ni Roderick noong 2010.
Bukod pa rito, nahaharap din ang aktor, kasama ang kanyang liaison officer na si Vicente Bajamunde, ng one count of violation of Section 3(e) of the Anti-Graft and Corrupt Practices Act.
Bukod sa mga nabanggit, nahaharap din si Roderick sa one count of falsification by a public officer at eight counts of falsification of public document.
Ayon kay Roderick, paulit-ulit na lamang ang reklamong inihahain laban sa kanya.
Sa kanyang Instagram, idinaan ng actor-politician ang pahayag niya tungkol sa isyu.
Sinamahan niya ito ng isang talata sa Bibliya ng Romans 8:31: “As long as you know God is for you, it doesn’t matter who is against you.”
Sa caption, sinabi ng comedian turned public servant, “Pagkatapos ng Barangay Election sa May 14 susunod na naman ang filing ng mga kandidatong tatakbo sa Oct para sa local election sa May 2019 sa QC.
"Lord, ano naman po ang susunod nila? No one is more powerful than you Lord. No one is above your Name!
"#paulit ulit #samesame.”
Sa comments section, sinagot ni Roderick ang isang follower at sinabing hindi na basta-basta naloloko ang mga tao ngayon.
Naalis sa puwesto si Roderick noong 2016 dahil sa kahalintulad na kaso.
Ngunit pinawalang-bisa ng Court of Appeals ang hatol ng Ombudsman at nakabalik sa puwesto ang konsehal.