Taliwas sa obserbasyon ng ilan na tila hindi na masaya si Maine Mendoza sa kanyang showbiz career, tiniyak ng kanyang talent manager na si Rams David na gusto pa rin ng phenomenal star ang ginagawa nito.
“She is happy,” sambit ni Rams.
Napagtanto na ba ni Maine kung ano talaga ang mundong pinasok niya?
“Unti-unti,” mabilis na sagot ng presidente ng Triple A Management.
“Remember, hindi naman kasi siya yung batang nag-audition… I mean, hindi siya yung dumaan sa proseso.
“After ng audition, dun mag-uumpisa.
“Kaya lang, after audition, just few weeks, sumabog, e.”
Ang tinutukoy ni Rams ay ang pagkakasali ni Maine sa Eat Bulaga! at ang pagiging phenomenal ng love team nito kay Alden Richards, ang AlDub.
Patuloy niya, “So, yung bata, parang, ‘Ano ba ‘to, is this a dream?’
“Parang sa bata, ang sayang fairytale. It’s a dream come true.
“Parang natulog ka lang, paggising mo, you’re a star, you’re an artist.”
Masaya pa rin ba si Maine sa mga ginagawa niya?
“Well, I asked her. Tinanong ko nga siya last week, ‘Gusto mo pa bang mag-artista?’
“Oo, gusto niyang mag-artista. So, masaya siya.
“Gusto pa niya ang ginagawa niya. Makikita mo naman sa telebisyon.
“Even sa kalye, kahit na anong sabi ng mga fans na ‘tanggalin mo na ‘yan sa kalye,’ naiinitan, nasasaktan.
“Pero gustung-gusto ni Maine sa kalye.
“Kahit minsan pagod na pagod na siya ng the night before, sasabihin niya, ‘Ay, papasok po ako.’”
Si Maine ay kabilang sa segment hosts ng "Juan For All, All For Juan" segment ng Eat Bulaga! kung saan nagpupunta sila sa iba't ibang barangay araw-araw.
Eksklusibong nakausap ng PEP.ph (Philippine Entertainment Portal) si Rams sa isang restaurant sa Timog Avenue, Quezon City, noong April 20, Biyernes.
HOW DOES THE MANAGER OF MAINE MENDOZA SEE ALDUB IN THE NEAR FUTURE?
Diretsahan ding tinanong ng PEP.ph si Rams David, Maine Mendoza's manager, kung ano na ang sitwasyon ngayon ng AlDub. Mayroon pa bang love team o hiwalay na sina Maine at Alden pagdating sa kanilang career?May pelikula pa ba silang pagtatambalan? Magkakasama pa rin ba sila sa isang teleserye? In a nutshell, mananatiling visible ang dalawa sa Eat Bulaga!, pero ayaw nang mag-teleserye ni Maine.
Pahayag ni Rams, “Unahin muna natin ang AlDub… we don’t know with Eat Bulaga! and their plans, but we still see them together sa Pamilya Nunal.
“Meron pa rin istorya na tumatakbo, so nandun pa rin yun."
Ang "Pamilya Nunal" ay isa ring segment sa Eat Bulaga.
"Yung AlDub movie," patuloy ni Rams, "hindi ko pa masagot bilang yung script niya e, hirap na hirap talaga kung ano ang babagay.
“Pinipili talaga kung ano ang best script.”
Sa teleserye?
Sagot ng manager ni Maine, “Yun, talagang nag-beg-off muna siya sa teleserye.
“Siguro if it’s the right project, lalo na ang drama, hindi muna sa drama. Parang hirap pa siya.”