Mukhang nakabawi na si Sarah Geronimo sa pagod at puyat na naranasan nito sa nakaraang concert sa Las Vegas, Nevada, noong nakaraang linggo.
Sa kanyang concert sa Chicago nitong May 4, ipinaliwanag ng 29-year-old singer-actress ang sanhi ng pagiging emosyunal niya sa Las Vegas.
Nagkaroon ng segment sa concert kung saan binalikan ni Sarah ang mga pinagdaanan sa showbiz, at nakangiting inilahad sa mga nanood ng kanyang sold-out concert, “Yung last time po naging emotional ako dahil talagang nag-panic po ako.
“Kasi wala po akong tulog, 'tapos parang nawawala yung boses ko. 'Diyos ko po! Lord!' sabi ko.
“Naalala ko lang po, siyempre, yung journey ko, beginnings namin at mga pinagdaanan.
“At saka siyempre, lahat po tayo may battles sa buhay, siguro nagpatung-patong na po.”
Pagkatapos nito ay pabirong humirit si Sarah ng, “Pero wala pong iyakan ngayon. Bawal. Pangit. Nanu-news tayo, e.
“Naba-bash tayo masyado, e. Huwag nang ganun.”
Binanggit din niya ang isa sa negatibong reaksiyon sa kanyang pagiging emosyunal sa huling concert.
Nakangiting sabi ni Sarah, “Akala nila nag-iinarte ako.
“Binigay na nga sa akin 'to, mag-iinarte pa ako?”
Ang kanyang sumunod na pahayag ay tila sagot naman sa mga ispekulasyong gusto na niyang magpahinga sa showbiz.
Sabi ng tinaguriang Popstar Royalty, “Mawawala din 'to, 'no? So hanggang meron, go lang, di ba?
“Ipon tayo, ganyan, trenta na. Ha-ha!
“Hindi, kailangan po talaga tuluy-tuloy lang.”
Sa hiwalay na bahagi ng concert, nagpasalamat ang Kapamilya star at nag-iwan ng maiksing paalala sa fans, na kilala bilang Popsters, "Thank you, thank you very much! Salamat! Kalma lang, kalma lang tayo!"