Iwas si Gabby Concepcion na pag-usapan ang mga patutsada laban sa kanya ng ex-wife niyang si Sharon Cuneta sa social media.
Bagamat walang direktang pangalang binabanggit ang Megastar sa kanyang social media posts, malinaw na ang kanyang pinariringgan ay si Gabby.
Kaugnay ito ng naunsiyami nilang reunion movie na ayaw na raw gawin ni Sharon.
Nang makausap ng PEP.ph (Philippine Entertainment Portal) at Cinema News si Gabby sa 49th Box Office Entertainment Awards noong Linggo, May 20, ay sinubukan naming tanungin siya tungkol dito.
Pero umiwas agad si Gabby na pag-usapan ang tungkol dito.
“Excuse me, pupunta muna ako dun,” palusot ng aktor.
DAUGHTER KC. Ngunit nagbigay naman ng pahayag si Gabby nang tanungin tungkol sa anak nila ni Sharon na si KC Concepcion.
Clueless daw ang Kapuso actor sa dahilan ng paghihiwalay ni KC at ng dating Azkals player na si Aly Borromeo.
“Hindi ko alam, hindi ko tinatanong. Hindi namin napag-uusapan,” sabi ni Gabby.
Suportado naman ni Gabby ang pamamahinga ngayon ng panganay na anak mula sa showbiz.
Aniya, “Well, maganda yung nagpapahinga once in a while pag may time.
“But, of course, we have to count our blessings.”
TV ACTOR OF THE YEAR. Sa 49th Box Office Entertainment Awards ng Guillermo Mendoza Memorial Scholarship Foundation, Inc. ay ginawaran si Gabby bilang TV Actor of the Year.
Ito ay para sa pagganap niya sa GMA-7 afternoon drama series na Ika-6 Na Utos, na tumagal sa ere ng mahigit isang taon.
Pahayag ni Gabby tungkol sa parangal na natanggap, “Very honored, hindi naman madalas nangyayari ito, so I'm very thankful.
“Mas nakaka-challenge saka mas nakakagana para mas maging magaling next time.”