Nagpakita ng suporta kay Kris Aquino ang ilang kapwa niya celebrity sa word-war na kinasasangkutan niya kay Presidential Communications Operations Office (PCCO) Assitant Secretary Mocha Uson.
Inalmahan ni Kris ang ginawang pagpo-post ni Mocha sa Facebook page nito ng aniya’y paglapastangan sa alaala ng kanyang mga magulang na sina dating Senador Benigno “Ninoy” Aquino Jr. at dating Pangulong Corazon Cojuangco-Aquino.
Sa naturang post, ikinumpara ng dating sexy actress-performer ang paghalik ni Pangulong Rodrigo Duterte sa isang babaeng overseas Filipino worker (OFW) sa South Korea kamakailan, sa paghalik kay Ninoy ng dalawang babaeng kapwa pasahero sa eroplanong kinalululanan ilang minuto bago ito mapatay sa tarmac ng Manila International Airport noong August 21, 1983.
Intensyon ng post ni Mocha na ipagtanggol sa pambabatikos ng netizens ang ginawang paghalik ni Presidente Duterte sa babaeng OFW.
Idinaan ni Kris sa kanyang Instagram at Facebook Live ang reaksyon sa ginawa ni Mocha. Dito ay ipinahayag niya ang kanyang galit sa post ng die-hard Duterte supporter at hinamon pa niya ito ng sabunutan o debate.
Tinugunan naman ni Kris ng pasasalamat ang mga celebrity na nagpaabot ng suporta sa kanya.
