Si Kiko Estrada ba ang tinutukoy ni Devon Seron na bago niyang boyfriend na taga-showbiz din, ngunit ayaw pa niyang pangalanan?
Ilang beses na kasi silang nakita in public na sweet sa isa’t isa.
Sa panayam kay Devon na lumabas dito sa PEP.ph (Philippine Entertainment Portal) kahapon, August 8, sinabi nitong taga-showbiz din ang kanyang boyfriend, pero hindi raw pang-showbiz ang relasyon nila.
"Secret, huwag na lang po, basta taga-showbiz din po siya."
Dagdag pa ng aktres tungkol sa ayaw niyang pangalanang boyfriend, “Ang masasabi ko lang, espesyal siya, masaya ako pag kasama ko siya.”
IS IT KIKO ESTRADA?
Sa Facebook fanpage na @DevKiOfficial, makikita rito ang maraming sweet moments nina Devon at Kiko.
Ang DevKi ang pangalan ng love team ng dalawang Kapuso stars, na nagkasama sa pelikulang Walwal.
Sa kani-kanilang Instagram account naman, may video at larawan ding ibinahagi ang dalawa sa kanilang followers.
At ang latest, nakita silang magka-holding hands sa isang mall.
Si Kiko Estrada nga kaya ang tinutukoy ni Devon Seron na bago niyang boyfriend na isa ring artista?
Bukas ang PEP.ph sa maaring ihayag ng dalawa tungkol dito.