Tila ini-enjoy ngayon ni John Lloyd Cruz ang kanyang pagiging private citizen na malayo sa mga rolyo ng camera at intriga sa showbiz.
Pero hindi pa rin maiwasan ng ilang netizens mag-post ng mga larawan o video ni John Lloyd kapag nakikita nila ang aktor sa mga pampublikong lugar.
Kagaya na lamang noong August 24, Biyernes, kung saan namataan si John Lloyd sa 70's Bistro bar sa Quezon City kasama ang musikerong si Dong Abay, ang veteran actor na si Ronnie Lazaro, at ilan pang mga kaibigan.
Noong nakaraang Lunes naman, August 27, namataan si John Lloyd na kumakain ng balut sa sidewalk kasama ang TV5 comedian na si Jun Sabayton.
Kasunod nito, nag-post ang isang fruit-stand owner sa Pasig City ng ilang larawan ni John Lloyd kung saan namili raw ito ng prutas para sa partner na si Ellen Adarna noon ding Lunes.
Nakasaad sa caption ni Sandra’s Fruit Stand, “A sweet and handsome guy drop by at our store to buy fresh durian for Ms. Ellen Adarna.
"He even watch how to open our fresh fruit. Thanks for stopping by John Lloyd Cruz… #choosetoLiveHealthy #OurCelebritySuki #wedeliver #anytimeanywhere.”
Isinilang ni Ellen ang anak nila ni John Lloyd na si Elias Modesto noong June 27, 2018.