Muli na namang namataan sina Maine Mendoza at Arjo Atayde na magkasama sa isang pampublikong lugar.
Kumakalat ngayon sa social media ang mga larawan ng Kapuso TV host at Kapamilya actor na kuha umano sa isang concert sa Quezon City nitong Huwebes ng gabi, November 8.
Sa mga larawang naka-post sa Instagram, nakasuot si Maine ng striped top, habang si Arjo ay naka-dark polo shirt at red cap.
May isang video ring nai-post sa Instagram.
Kuha rin umano ang video na ito sa parehong event.
Sa video, may katabing lalaki si Maine. Hindi man kita ang mukha ng lalaki, makikita ang black polo shirt at red cap.
Sa pagpaling ng camera, makikita ang isang wall sa likuran nila na punumpuno ng posters.
Base sa posters, ang concert na pinanood nina Maine at Arjo ay ang Karpos Live 3.3 na ginanap sa Vertis Tent, Vertis North, sa Quezon City, Huwebes ng gabi.
Sa social media, may netizens ding nag-post ng kanilang mga larawan sa parehong wall sa concert venue.
Ilan sa performers noong gabing iyon ay ang American pop group na Cigarettes After Sex at ang kilalang local band na Up Dharma Down.
Narito naman ang poster ng naturang event na katulad ng nakadikit sa wall:
Hindi ito ang unang pagkakataong nakitang magkasama sina Maine at Arjo.
Una silang nakuhanang magkasama sa isang restaurant sa Quezon City.
Pagkalipas ng ilang araw ay namataan sila sa isang bar sa Bonifacio Global City.
At nito lamang Halloween break ay may mga kumalat silang litrato na kuha mula sa Bali, Indonesia, ngunit wala silang kuhang magkasama.