Ryza Cenon condemns false accusations, bullying by Maine Mendoza fans

Inalmahan ni Ryza Cenon ang akusasyong may lihim siyang disgusto at inggit sa Kapuso actress-TV host na si Maine Mendoza.

Kaugnay ito ng pambabatikos kay Ryza ng ilang fans ni Maine dahil sa diumano'y snubbing incident na naganap noong Gabi Ng Parangal ng Metro Manila Film Festival (MMFF), na ginanap sa The Theater at Solaire nitong nakaraang Huwebes, December 27.

Nag-ugat ito sa video ng acceptance speech ng isang babaeng tumanggap ng FPJ Memorial Award para sa pelikulang Jack Em Popoy: The Puliscredibles, na pinagbibidahan nina Coco Martin, Vic Sotto, at Maine.

Si Ryza ay kasama rin sa cast ng pelikula.

Base sa Twitter post ni Ryza noong December 28, nagpagkamalan ng ilang netizens na siya ang babaeng tumanggap ng award.

Ipinakita rin ni Ryza ang screen shot ng comments ng netizens na kinukuwestiyon kung bakit hindi umano binanggit ni Ryza ang pangalan ni Maine sa acceptance speech para sa pelikula nila.

Kasabay nito ang akusasyong sinadya ni Ryza iyon dahil hindi niya gusto si Maine.

Pero nilinaw ni Ryza na hindi siya ang babaeng nasa video kundi isang executive na kabilang sa production team ng pelikula.

Pagkatapos ay kinondena ni Ryza ang umano'y pambu-bully sa kanya ng fans ni Maine, gayong mali ang impormasyong nakalap ng mga ito.

Ayon pa kay Ryza, ipinarating na rin niya sa co-star niyang si Maine ang saloobin niya hinggil sa maling akusasyon ng ibang fans nito.

Aminado raw si Ryza na hindi lahat ng fans ni Maine ay dawit sa isyu.

Pero paalala ng Kapamilya actress, hindi dapat basta na lang mam-bash ang fans dahil sa kung anumang isyu na kinasasangkutan ng idolo nila, lalo na kung wala naman itong basehan.