Sa kauna-unahang pagkakataon, si Maine Mendoza na mismo ang nagbahagi ng larawan kung saan magkasama sila ni Arjo Atayde.
Kaiba ito sa mga pagkakataong namataang magkasama ang dalawa dahil madalas ay paparazzi photo ang mga iyon.
Makikita ang latest picture nina Maine at Arjo sa Instagram Story ng Eat Bulaga! Dabarkads, Miyerkules ng gabi, February 20.
Kuha ito sa official launch ng bagong make-up product na iniendorso ni Maine.
Nagpakuha sina Maine, 23, at Arjo, 28, ng larawan sa tila photo wall ng event na may nakasabit na wrecking ball.
Nakaupo si Maine sa wrecking ball habang ang Kapamilya actor ay nakatayo sa likuran ng dalaga.
Pareho silang naka-wacky pose.
Simpleng caption ni Maine: "uy, may fan."
Noong February 11, naiulat ang pagbahagi ni Arjo ng litrato ni Maine na noong panahong iyon ay nasa New York para sa lipstick brand na iniendorso ng Kapuso star.
Nasa U.S. din si Arjo noon dahil kabilang siya sa concert show ni Maja Salvador sa Virginia, U.S.A.
Nagpahiwatig noon si Arjo na tila ang pakikipagkita niya kay Maine ang "last stop" niya roon sa Amerika.
Bago ang pinaniniwalaang date ng dalawa sa U.S., nauna nang inamin ni Arjo na "exclusively dating" sila ni Maine.