Mar Roxas draws flak for being portrayed as typhoon Yolanda hero in campaign comics

Tumanggap ng matinding pambabatikos ang kampo ni former Department of Interior and Local Government (DILG) Secretary Mar Roxas.

Kaugnay ito ng kumalat na komiks na naglalarawan ng diumano’y kabayanihan ni Mar noong kasagsagan ng Yolanda tragedy sa Tacloban noong 2013.

Ang naturang komiks ay may pamagat na “Sa Gitna Ng Unos” at may kalakip na subhead na nagsasabing “batay sa tunay na pangyayari.”

Base sa isang bahagi ng komiks, isang araw bago hinagupit ng bagyong Yolanda ang Tacloban ay naroon na raw sina Mar at Defense Secretary Voltaire Gazmin.

Inilarawan dito kung paanong pinapasok ni Mar sa tinutuluyang hotel ang mga residenteng walang ibang masilungan.

Sabi pa sa narration ng comics, “Muntik-muntikan nang mapahamak si Mar.”

Kinabukasan ay mabilis umanong inaksyunan ni Mar ang mga pangangailangan ng mga biktima ng trahedya, pati na rin ang pagsasaayos ng airport upang makalapag ang mga eroplanong may dalang relief goods.  

Nabanggit din sa komiks kung paanong pinalaki diumano ng media ang “maikling pagtatalo at munting hindi pagkakaunawaan” nina Mar at Tacloban Mayor Alfred Romualdez.

Ngunit kasabay ng pagkalat ng komiks na ito sa social media ay ikinagalit ng netizens ang diumano’y kasinungalingang nilalaman nito.

Mayroon ding Tacloban-based writer na si Lottie Salarda na nagpahayag ng pagkadismaya sa komiks ni Mar.

Samantala, nanindigan ang kampo ni Mar na totoong tinutukan nang husto ng dating DILG secretary ang pag-abot ng tulong sa mga biktima ng bagyong Yolanda.

Sabi pa ng spokesman ni Mar na si Akbayan party-list representative Barry Gutierrez, “Ginawa ang comics ay gawa ng mga supporters na gustong ipaalam sa ating mga kababayan ang ginawa ni Mar sa Yolanda.

“Ginawa ito dahil sa patuloy na pagkalat ng kasinungalingan tungkol sa kanyang mga nagawa."