Nagpositibo sa coronavirus disease o COVID-19 ang Hollywood actor na si Tom Hanks at ang kanyang asawang si Rita Wilson.
Ibinunyag ng 63-anyos na two-time Oscar winner ang impormasyong ito sa kanyang verified social media accounts sa Facebook, Twitter, at Instagram.
Ayon sa American actor, kasalukuyan silang nasa Australia ng kanyang misis na si Rita, 63.
Nakaramdam daw sila ng mga sintomas kagaya ng lagnat, pananakit ng katawan, at sipon.
“Hello, folks. Rita and I are down here in Australia,” bungad ni Tom sa kanyang posts.
“We felt a bit tired, like we had colds, and some body aches.
“Rita had some chills that came and went. Slight fevers too.”
Sumunod niyang pahayag: “To play things right, as is needed in the world right now, we were tested for the Coronavirus, and were found to be positive.”
Ayon sa World Health Organization (WHO), ang mga karaniwang sintomas ng COVID-19 ay lagnat, ubo, at hirap sa paghinga.
Pagpapatuloy ni Tom, susunod sila sa medical protocol kaugnay ng COVID-19 at sasailalim sila sa mga pagsusuri.
Tiniyak din ni Tom na magbibigay siya ng update sa kanilang kalagayan.
“Well, now. What to do next?
“The Medical Officials have protocols that must be followed.
“We Hanks’ will be tested, observed, and isolated for as long as public health and safety requires.
“Not much more to it than a one-day-at-a-time approach, no?
“We’ll keep the world posted and updated.
“Take care of yourselves!
“Hanx!”
Nasa Australia sina Tom at Rita para sa pre-production ng untitled Elvis Presely movie na ididirek ni Baz Luhrmann (Moulin Rouge).
Gagampanan ni Tom sa pelikula ang role ng longtime manager ni Elvis na si Colonel Tom Parker.
Nanalo si Tom bilang Best Actor sa Oscars para sa mga pelikulang Philadelphia (1993) at Forrest Gump (1994).
Ilan pa sa mga pelikula niya ay ang Sleepless in Seattle (1993), Cast Away (2000), The Da Vinci Code (2006), Angels & Demons (2009), Captain Phillips (2013), Saving Mr. Banks (2013), Inferno (2016), at ang Toy Story franchise.
COVID-19 DECLARED PANDEMIC
Nitong Miyerkules, March 11, idineklara ni WHO Chief Tedros Adhanom Ghebreyesus ang COVID-19 na isa nang pandemic, o ang sabay-sabay na pagkalat ng isang epidemya sa iba’t ibang bahagi ng mundo.
Sa pahayag ng WHO chief, nasa 118,000 na ang kaso ng COVID-19 sa 114 na bansa; at 4,291 katao na ang namamatay dahil dito.
Sinabi rin ni Ghebreyesus na inaasahan nilang madadagdagan pa ang bilang ng mga maaapektuhan ng virus.
Habang isinusulat ang balitang ito, ang Australia ay mayroong 139 kaso ng COVID-19.
Sa Pilipinas, mayroon nang 49 confirmed cases ng COVID-19.