Trigger warning: rape
May kabuuang labintatlong (13) taong pagkakakulong ang naging sentensiya ng Beijing court sa China sa Chinese-Canadian popstar na si Kris Wu.
Ito'y matapos siyang mahatulang guilty sa kasong rape at sexual offenses.
Si Kris ay unang sumikat nang naging miyembro siya ng all male K-pop group na EXO. Taong 2014 nang iwan niya ang grupo at magdesisyong maging solo artist sa China.
Noong August 1, 2021, unang na-detain si Kris matapos akusahan ng 19-anyos na estudyante na biktima siya ng date-rape.
Read: Chinese-Canadian pop star Kris Wu detained for alleged rape
Ayon sa salaysay ng biktima, nakipagkita siya kay Kris sa pag-aakalang bibigyan siya nito ng trabaho, ngunit nauwi ito sa inuman at kalauna'y ginahasa siya habang siya ay lasing at walang malay.
Ang pagsisiwalat na ito ng estudyante ang naging daan upang lumantad ang iba pang naging biktima ng pop star.
Base sa ulat ng South China Morning Post, ngayong Biyernes, November 25, 2022, lumabas sa isinagawang imbestigasyon ng Beijing's Chaoyang District People’s Court na mula pa noong November hanggang December 2020 ay tatlong babae pa ang ginahasa ni Kris.
Maliban sa kasong rape, nahatulan ding guilty ang 32-year-old former EXO member sa kasong "crime of assembling a crowd to engage in sexual promiscuity" noong July 2018.
Napagdesisyunan din ng korte na ipa-deport si Kris, ito'y kahit sinabi ng mga abogado sa China na ang deportation ay karaniwang nangyayari kapag na-serve na ng isang defendant ang kanyang sentensiya.
Nakasaad sa ulat: "In the morning of November 25, 2022, Beijing Chaoyang People’s Court of First Instance came to a decision regarding the rape and group licentiousness case for defendant Kris Wu.
"For rape, defendant Kris Wu has been sentenced to 11 years and 6 months in prison plus deportation. For group licentiousness, he has been sentenced to 1 year and 10 months in prison. Combined, he’s sentenced to 13 years in prison plus deportation."
Bukod sa pagkakakulong, pagbabayarin din si Kris ng Beijing Municipal Tax Service ng kabuuang danyos na $83.8 million (humigit-kumulang 600 million yuan) para sa tax evasion.