Ikinasal na ang Korean superstar na si Lee Seung Gi sa aktres na si Lee Da In ngayong Biyernes, April 7, 2023.
Ginanap ang pag-iisang dibdib ng dalawa sa Grand Intercontinental Seoul Parnas Hotel sa Seoul, South Korea.
Read: Korean singer-actor Lee Seung Gi to marry actress Lee Da In on April 7
Katulad ng inaasahan, dinagsa ng celebrity guests ang kasal nina Lee Seung Gi at Lee Da In.
Dumalo sa kasal ang mga kasamahan ni Lee Seung Gi sa industriya na sina Lee Dong Wook, Kim Na Gil, Han Hyo Joo, Lee Sang Yoon, Yoo Yeon Sok, Lee Dong Hwi, Lee Se Young, Lee Hee Joon, Kim Soo Mi, Ahn Eun Jin, Bae In Hyuk, Kim Mi Sook, Kim Yong Gun, at Yoo Dong Geun.
Naroon din ang entertainers/comedians na sina Kang Ho Dong, Lee Kyung Kyu, Yang Se Hyung; at K-pop idols na sina Jay Park, Kyuhun at Eunhyuk ng Super Junior, Lee Hong Gi ng FT Island, Sungjae ng BTOB, Chae Eun Woo ng Astro, at Joshua at Hoshi ng SEVENTEEN.
Ang host ng wedding ceremony ay ang sikat na comedian at Running Man member na si Yoo Jae Seok.
Si Lee Seung Gi, 36, ay nagsimula bilang singer sa Korean entertainment industry. Kinalaunan ay pumalaot siya sa pag-arte sa mga drama series at pelikula, at pati na ang paghu-host sa mga variety program at TV shows.
Tinagurian bilang "King of Ballad" sa South Korea, kabilang sa hit songs ni Lee Seung Gi ay “Will You Marry Me?,” “Love Taught Me To Drink,” “Shadow,” “Return,” “Tonight,” “Lies,” at ang kanyang debut single na “Because You’re My Woman.”
Napanood naman siya sa mga K-drama na Brilliant Legacy (2009), My Girlfriend is A Gumiho (2010), The King 2 Hearts (2012), Gu Family Book (2013), You're All Surrounded (2014), Hwayugi: A Korean Odyssey (2017-2018), Vagabond (2019), at Mouse (2021).
Dalawa pa lamang ang pelikula niyang naipalabas: Love Forecast (2015) at The Princess and the Matchmaker (2018).
Ilan naman sa mga TV programs na nilabasan niya ay ang X-Man (2004-2006), 2 Days 1 Night (2007-2012), Strong Heart (2009-2012), New Journey To The West (2015), at Master In The House (2017-2022).
Si Lee Da In naman, 30, ay isang aktres.
Kabilang sa mga nilabasan niyang drama series ay Alice (2020), My Golden Life (2017-2018), Hwarang (2016-2017), at Make A Woman Cry (2015).