Bagamat malaki ang pagtatangi ni U.S. President Joe Biden at ng misis niyang si Jill sa kanilang family pet na si Commander, minabuti nilang alisin muna ito sa White House campus.
Sangkot kasi ang two-year-old German Shepherd sa mga insidente ng pangangagat sa ilang staff members at mga U.S. Secret Service officers.
Sabado, September 30, nang huli umanong mamataan ang aso sa balkonahe ng White House, hanggang kumpirmahin ni First Lady Communications Director Elizabeth Alexander nitong October 4, 2023 na tuluyan na ngang evicted sa White House ang aso.
Ani Alexander sa email statement na nailathala ng apnews.com, “Commander is not presently on the White House campus while next steps are evaluated.”
Malaki raw ang pagpapahalaga nina President Biden at First Lady sa seguridad ng kanilang mga kawani.
“They remain grateful for the patience and support of the U.S. Secret Service and all involved, as they continue to work through solutions.”
Read: Paramedic treats teen with horrific injuries; finds out only later it was her own daughter
‘WORSE THAN REPORTED’
May White House insiders ang nagsabing “worse than previously reported” ang mga insidente ng pangangagat ni Commander sa staff ng US president, partikular sa kanyang guards, ayon sa foxnews.com.
Mahigit sampung insidente na raw ang naitalang pangangagat mula noong October 2022 hanggang January 2023.
At ang isa sa mga ito ay kinailangang dalhin sa hospital for treatment.
Sa pagtataya ng ilang mga kritiko, 24-36 times na umanong nangagat ang aso.
At ang pinakahuli ay nitong September 25, sa hindi pinangalanang U.S. Secret Service officer.
Ayon kay USSS Chief of Communications Anthony Guglielmi, nilapatan ng lunas ang biktima, on-site, ng isang medical personnel.
Si Commander ay ipinakilala ng First Family sa publiko noong December 2021.
NOT THE FIRST DOG TO BITE WHITE HOUSE STAFF
Hindi ito ang unang pagkakataong naiulat ang aggressive behavior ng family pet ng mga Biden, dahilan upang alisin ito sa official residence.
Noong March 2021, ang rescue dog German Shepherd na si Major na noo’y three years old ay napilitang ipaubaya ng mga Biden sa kanilang family friend sa Delaware matapos ang ilang insidente din ng pangangagat.
Sumailalim pa umano ito sa training ngunit tuluyan ding inalis sa White House grounds.
May isa pa silang German Shepherd na nagngangalang Champ, ngunit pumanaw ito noong 2021 sa edad na 13.
Isinisisi ni First Lady spokesperson Alexander ang pagiging agresibo ng mga alagang aso ng First Family sa “stressful environment” ng White House.
Aniya, patuloy na naghahanap ng solusyon ang presidente at ang kanyang pamilya “to help Commander handle the often unpredictable nature of the White House grounds.”
Hindi naman binanggit kung saan ito dinala at kung makababalik pa ito sa White House.
Gayunman, may ilang grupong naniniwala na hindi na dapat pang maging dahilan ng kapahamakan ng mga empleyado ang asong si Commander.
Sa interview kay Federal Law Enforcement Officers Association President Larry Cosme ng New York Times, tila nabagalan ito sa naging aksiyon ng White House.
"I’m glad they’re addressing it now. But how many bites does it take to address it?"
“Obviously, this has become a major problem,” dagdag niya.