Dalawang Overseas Filipino Workers (OFW) ang kumpirmadong namatay sa Israel kaugnay ng sigalot sa pagitan ng Israel at ng Hamas, isang militant group sa Palestine.
Isa pang OFW ang napaulat na nasawi, subalit kinukumpirma pa ito.
Anim ang nawawala, isa ang sugatan, at tatlo pa ang pinaghahanap.
Ito ang estado ng ilan sa tinatayang 140 OFWs sa ika-anim na araw ng Israel-Hamas conflict na nangyayari ngayon sa Middle East, ayon sa ulat ng Department of Foreign Affairs (DFA).
Hindi malinaw kung kasama sa talang ito ng DFA ang isang Filipina nurse na viral ngayon sa Facebook dahil nasawi siyang bayani.
Read:
- OFWs recount horror stories in the ongoing Israel-Palestine conflict
- Pinoy sa Israel, ibinahagi ang kalagayan nila sa gitna ng lumalalang giyera
PINOY CASUALTIES
Samantala, narito ang ilang detalye na binigay ng DFA tungkol sa dalawang Pinoy na nasawi sa unang araw ng paglusob ng Hamas sa Israel noong Sabado, October 7, 2023.
Ang isa ay 33 anyos na female caregiver mula sa Pangasinan. Anim na taon na ito sa Israel at bagong kasal.
Ang isa pa ay 42 anyos na lalaki mula sa Pampanga.
Hindi muna sila pinangalanan bilang respeto sa kanila at sa kanilang pamilya.
“Napatay po sila habang po umaatake ang terorista sa kanilang communities," ani Dina Ponciano, welfare officer ng Philippine Embassy sa Tel Aviv.
Ang kuwento naman ni Rodolfo Gabasan, labor attache ng Philippine Embassy sa Tel Aviv, “Yung isa po ay habang pinupuwersa ng militanteng mga terorista yung kanilang mga pinto.
"Pagbukas ng pinto, niratrat po yung mag-amo—yung caregiver at saka yung kanyang amo.
“Yung isa po ay pinatay, pero hindi po namin alam kung anong circumstance.
“Pero isa po siya sa mga natangay ng Hamas sa kasagsagan po ng pananalasa ng mga terorista.”
Kumakalat ngayon sa Facebook ang larawan ng isang Filipina nurse na kasama rin umano sa mga namatay.
Ang mga nag-post ay mga Israelis, kasama si Fleur Hassan-Nahoum, deputy mayor ng Jerusalem.
Diumano, namatay na bayani ang nurse dahil sa halip na tumakas ay hindi nito iniwan ang inaalagaang elderly.
Bahagi ng kumakalat na post, “When the cruel terrorists arrived, she had the chance to escape, but she decided to stay, out of endless loyalty with her patient Nira. Both of them were brutally murdered.”
Sa mga posts, tinawag na “true hero” ang Pinay nurse.
Sinabi rin ng DFA na 70 sa 140 OFWs sa Israel ang nagpahayag na nais na nilang ma-repatriate.
Pinag-aaralan ngayon ng gobyerno kung paano ililipad ang mga Pilipino sa Israel pauwi ng bansa.