Kung source of joy ang pagkakaroon ng pet, natuklasan ng Siargao-based businesswoman na si Ruan Mac na isa rin itong malaking responsibilidad.
Madalas kasing tumakas para gumala ang kanyang asong si Nougat, isang Siberian Husky.
“Naging favorite place niya talaga yung market,” kuwento ni Ru sa panayam sa kanya ng Summit OG. “Kilala na siya ng mga vendors doon.”
Sobra ang kanyang takot tuwing mawawala si Nougat.
Bulalas niya, “Oh my God, ito pala yung feeling ng nanay ko pag wala pa ako ng dis-oras ng gabi.”
Mabuti naman at bumabalik din naman si Nougat after 30 minutes.
Pero may mga pagkakataon talagang hindi ito nakakauwi.
CERTIFIED BEACH BUM
Mahilig ding magpuntang mag-isa sa beach si Nougat.
Pagbabahagi ni Ru, “Umuuwi siya dito na basang-basa siya at puro siya sand. Nae-enjoy niya na nagbi-beach siya on his own.”
Isinasama rin niya ito kapag may errands siya para hindi rin ito mainip at maisipang umalis mag-isa.
“May time pa na sa sobrang desperate ko na nawawala siya, binilhan ko siya ng AirTag,” ani Ru. “Nawala yung AirTag.”
Natatakot din siya na kapag naggagagala si Nougat ay baka makakagat ito ng tao o masagasaan o maging cause ng accident.
TIPIKAL NA “ESCAPE ARTIST” ANG SIBERIAN HUSKIES
Ayon sa Google, mahilig talagang tumakas ang mga Siberian Huskies dahil madali silang ma-bore.
Masyado rin silang curious.
“Ganoon daw pala talaga sila. They’re escape artists,” ani Ru.
Dahil alam na niya ang attitude ni Nougat na tumatakas pag naiinip, pinadagdagan niya ang bakod sa kanilang bahay.
Lagi na ring may nagbabantay rito.
Tinutulungan naman siya ng Facebook group na Siargao Business Classifieds kapag nasa galaan si Nougat.
Nagpo-post ang mga members nito kung saan nakita ang kanyang pet.
LOVE NA LOVE KAHIT MAKULIT
Dahil kay Nougat ay natutunan ni Ru na patience, really, is a virtue.
“He taught me patience. Hindi ko mapabayaan.
“Kahit inis na inis ako sa kanya kapag nawawala siya, at the end of the day, love ko pa rin siya. Hindi ko ma-imagine yung life ko ngayon without him.”
Kung na-curious kayo kung gaano kakulit si Nougat, panoorin ang video na ito ng Summit OG: