Nag-post si Rodney Nicodemus, isang math teacher sa Bulwang Elementary School, District of Numancia, Aklan, ng kanyang mga larawan habang nagtuturo sa loob ng classroom.
Kakaibang face-to-face class ito dahil ang kanyang nag-iisang estudyante ay si Lola Merlita Militar, 79.
Ang caption ni Teacher Rodney sa kanyang post sa Facebook noong October 27, 2021: “Tutor anay sa Lola bisan bukon akon estudyante ana apo. Para maw man kuno maturo sa ana apo. Mayad pa si Lola nanda ngara gahutuhot. Sana ganito din ang ibang kabataan at nanay.”
Roughly translated, ibig sabihin ni Teacher Rodney ay nagpapa-tutor sa kanya si Lola Merlita para maturuan naman nito ang mga apo.
Pagbabahagi ng guro, "She approached me na kung puwedeng turuan ko raw siyang muli. This is the second time around na magpapaturo siya sa akin in mathematics."
Aminado si Lola Merlita na mahihirapan siyang turuan ang dalawang apo na 11 years old at 4 years old sa kanilang module lessons lalo na pagdating sa math.
Hindi raw kasi siya nakapagtapos ng pag-aaral.
Siya ang nag-aalaga sa mga apo dahil nagtatrabaho sa Cebu ang parents ng mga ito.
Pinatunayan naman ni Teacher Rodney na sobrang desidido si Lola Merlita na matuto para sa mga apo.
Ayon sa guro, "So ang topic na kanyang ipatuturo sa akin is subtraction of mixed numbers na kung saan hindi raw alam ng kanyang apo at hindi rin niya alam."
Parehong pinuri ng netizens sina Teacher Rodney at Lola Merlita dahil sa kanilang sakripisyo para sa mga learners.
Mayroon ding nagbahagi kung gaano kahirap para sa mga parents o guardians na gaya ni Lola Merlita ang mag-asikaso ng mga anak o apo habang hindi pa allowed ang face-to-face classes.
