Willing ka bang magbayad para matulog lang sa loob ng bus?
Patok ngayon sa Hong Kong ang "Bus Sleeping Tour" na ginawa para sa mga taong hirap makatulog sa gabi, pero nakakatulog habang nasa loob ng umaandar na sasakyan.
Sasakay ang pasahero sa double-decker bus at hahanap ng puwesto para matulog. Bibigyan din siya ng eye mask at ear plugs.
Bibiyahe ang bus sa loob ng limang oras, at nasa 47 miles o higit 75 kilometers haba ng babaybayin nito.
Ang presyong $13-51 (PHP650 - PHP2,550) ay depende kung pupuwesto ang pasahero sa lower o upper deck ng bus.
INSPIRED BY TIRED COMMUTERS
Ang serbisyong ito ay sagot sa pagod na nararanasan ng commuters araw-araw.
“When we were brainstorming new tours, I saw a social media post from my friend saying that he was stressed out by his work, he couldn’t sleep at night,” ani Kenneth Kong sa ulat ng Associated Press.
“But when he was traveling on the bus, he was able to sleep well. His post inspired us to create this tour that lets passengers just sleep on the bus.”
Si Kenneth ang marketing and business development manager ng ulu travel, ang organizer ng bus tours.
Kung titingnan ang website ng ulu travel, mababasa na ang pagsakay sa bus ay nahahati sa apat na categories:
- "Zero-decibel Sleeping Business-Class Cabin," upper deck
- "VIP Panorama Cabin," upper deck
- "Zero-decibel Sleeping Economy-Class Cabin," lower deck
- "Extra-legroom Cabin," lower deck
Ini-launch ang bus tour service noon lamang October 2021.
THE TOUR EXPERIENCE
Babaybayin sa biyahe ang Tuen Mun highway at North Lantau Island sa Hong Kong.
Pero hindi lamang pagtulog ang kasama sa tour. Bahagi ng package na babayaran ng pasahero ang “Food Coma Lunch” at signature check-in spots.
Ang Food Coma Lunch ay isang two-course meal na pagsasaluhan ng lahat ng pasahero bago sila bumiyahe. Tinawag itong "Food Coma" dahil makakatulog ang mga pasahero sa kanilang kabusugan.
Hihinto rin ang bus sa ilang tourist spots para sa picture-taking. Kasama sa stopovers ang Ho Wo Street, Butterfly Beach, Inspiration Lake, at South Perimeter Road Traffic Calming Street, na malapit sa Hong Kong International Airport.
Depende na sa customer kung nais pa niyang bumaba o ituloy-tuloy na lang ang tulog pagdating ng stopovers.
Ayon sa isang eksperto, nakakatulog sa public transport ang isang tao dahil ito ay isang uri ng conditioning.
“People in Hong Kong don’t have enough time to sleep,” ani Dr. Shirley Li, principal investigator ng Sleep Research Clinic and Laboratory sa University of Hong Kong.
“That’s why we have to kind of use other times to sleep, which is our daily commute, especially when we are travelling on public transport.
“For some people, they may tend to associate public transport with their sleep. And that’s why they found it easier to fall asleep on the bus.”