Naging instant milyonarya si Rosie Vargas Villa noong 2018 matapos manalo sa isang online search for the best nanny in United Arab Emirates (U.A.E).
Mismong amo niyang Argentinean-American ang nagsali kay Rosie sa contest.
Kumpiyansa ang employer na malakas ang laban ni Rosie dahil sa dedikasyon niya bilang domestic helper.
Noong mga panahong iyon, five years nang namamasukan si Rosie sa kanyang amo, na pamilya ang trato sa kanya.
Out of 41 contestants, si Rosie ang nanalo at ginantimpalaan ng 70,000 Dirhams o PHP1 milyon.
Kung tutuusin, puwede nang umuwi sa Pilipinas si Rosie at magsimula ng negosyo para makasama ang kanyang anak.
Pero hindi iniwan ni Rosie ang kanyang employer, lalo’t maliliit pa ang dalawang anak ng kanyang amo na siya ang nagpalaki at nag-aruga.
Naibahagi ang kuwento ni Rosie sa Rated K noong January 2019.
Na-feature din siya sa Global Pinoy Unlimited ng GMA Pinoy TV, March 9, 2021.
ROSIE'S STORY AS DOMESTIC HELPER
Si Rosie ay taga-Barotac Nuevo, Iloilo City.
Nagtapos siya ng secretarial course at nagtrabaho sa isang hotel sa Iloilo.
Pero nangibang-bansa siya at nagtrabaho sa Singapore, Hong Kong, at India.
Nakaranas si Rosie ng di magandang trato sa mga naging amo.
Aniya, “Nung sa Hong Kong ako, dalawang employer ako doon.
“Overworked naman ako kasi dalawang bahay ang tinatrabaho hanggang alas-dos [ng madaling araw] po ako.
“Alas-kuwatro po [ng umaga] ako magising. Umpisa na naman. Two hours lang tulog ko.”
Sumunod niyang naging amo ay isang French, na kalaunan ay nawalan ng trabaho.
Taong 2013, nakapunta si Rosie sa Dubai, U.A.E., at doon nakilala ang kanyang among Argentinean-American na naging mabait sa kanya.
Sumasahod si Rosie ng PHP50,000 na halos lahat ay pinapadala niya sa Pilipinas.
Single mom siya at may anak na babae sa Pilipinas na 21 anyos na ngayon.
Inilarawan ni Rosie ang kanyang trabaho bilang all-around kasambahay.
“May every-day routine talaga ako. May oras ako sa bata, may oras ako sa aso, may oras sa pagluluto, at sa bahay. Parang nakaschedule na siya,” kuwento niya.
“Talagang in the end of the day, tapos ang trabaho ko. Nakikita nila devoted ako sa trabaho.
“Alam niya yung trabaho talagang nasa puso ko,” sabi niya tungkol sa amo.
Shoulder to cry on nga raw niya ang kanyang employer.
“Pamilya ko na po sila at ganun din sila sa akin.”
Maging sa kanyang mga alaga, ang turo sa kanila ay hindi nanny si Rosie, kundi “special auntie” nila.
Ang magandang trato sa kanya at magandang relasyon sa employer ang dahilan kung bakit di umalis si Rosie kahit naging instant milyonaryo siya noong 2018.
Katwiran ni Rosie, makakahanap siya ng puwedeng pumalit sa kanya pagdating sa trabaho, pero hindi niya maiwan ang mga alagang bata.
Madalas nga raw siyang tuksuhin na milyonaryo, pero hindi ito ang mahalaga kay Rosie.
“Pera lang iyon. Mauubos lang iyon, e. Yung alaga ko, di ko iyan maiwan-iwan.
“Kahit may anak ako sa Pilipinas, pero naiintindihan niya. Malaki na siya.
“Pero itong mga bata, ayaw ko lang maiwan na ganoon na lang bigla, kasi nga ako yung nagpalaki sa kanila.”
Giit ni Rosie sa PHP1 milyong napanalunan, “Wala lang iyan. Pero yung employer ko po talagang sobra pa sa milyon iyan, e.
“Iyan yung talagang dalhin ko habang buhay—yung mga employer ko, saka mga bata dahil sa magandang pagsasamahan namin dito. Parang yung puso ko dito.”
Hanggang ngayon, kita ang saya ni Rosie sa piling ng kanyang employer.
Bakas sa social media posts ni Rosie ang pag-eenjoy niya bilang DH sa mga amo sa Dubai.