Malaki ang sentimental value ng napiling "something old" ni Ma. Loufel Pasaol para sa kanyang kasal.
Ang isinuot kasi ni Loufel ay ang traje de boda na isinuot ng kanyang inang si Marylou, apat na dekada na ang nakalilipas.
Ikinasal si Loufel, isang 30-year-old cabin crew member ng Qatar Airways, kay Joseph Andro L. Sicat, isang 29-year-old professional photographer, sa Cebu noong April 11, 2022.
Sa panayam ng PEP.ph (Philippine Entertainment Portal) via email, ikinuwento ni Joseph kung bakit naisipan ng kanyang misis na isuot ang "heirloom gown" ng kanyang ina.
“Mainly to honor her deceased father and make him still be a part of her special day,” ani Joseph sa PEP.ph.
“As a Papa's girl, it has always been Loufel's dream to have her father walk her down the aisle and be handed over to her husband.”
Pero sa kasamaang palad, pumanaw ang ama ni Loufel na si Felizardo noong 2014.
Bukod sa tribute sa ama, isinuot ni Loufel ang gown bilang pasasalamat sa ina sa lahat ng mga sakripisyo nito kay Loufel at isa pang kapatid.
1982 x 2022. Noong 1982, ikinasal ang mga magulang ni Loufel na sina Felizardo at Marylou Pasaol. After 40 years, ikinasal si Loufel sa long-time boyfriend na si Joseph Sicat. Isinuot ni Loufel ang wedding gown ng ina.
Ginawa raw ang wedding gown ng kaibigan ni Marylou na si Myrisia Roble noong 1982.
Para bumagay ang gown kay Loufel, may kaunting alterations lang na ginawa ang Cebuano designer na si Lemuel Rosos.
(Left photo) Si Marylou Pasaol na nagpagawa ng gown sa kaibigang si Myrisia Roble noong 1982. (Right photo) Ngayong 2022, si Loufel suot ang gown ng inang si Marylou na ipapa-alter sa Cebuano designer na si Lemuel Rosos.
THE 40-YEAR-OLD WEDDING GOWN
Sa Facebook page ng photography business ni Joseph na ClickedwithLove Studios, inilahad ang makulay na kuwento ng puting wedding gown ng ina ni Loufel.
Bata pa lang daw si Loufel ay madalas niyang paglaruan at isuot ang damit pangkasal ng kanyang ina.
Gandang-ganda raw si Loufel sa damit ng kanyang ina kaya isinusuot niya ito at nagpapanggap na isang white lady.
Madalas daw siyang pagalitan ng kanyang ina noon.
“Her mother would tell Loufel that for her, the wedding dress is sacred, it is the most important piece of clothing she has ever own and worn,” saad sa Facebook post (published as is).
Kaya sinabihan ang batang Loufel ng kanyang ina na dapat ingatan ang damit. Hindi naman masyadong maunawaan ito noon ni Loufel dahil sa kanyang murang edad.
Sa pagtanda ni Loufel, inasam niyang maihatid ng kanyang ama sa araw ng kanyang kasal. Pero hindi natupad ang pangarap niyang ito nang pumanaw ang ama.
Kaya sa kasal nila ni Joseph, na 12 years niyang karelasyon, nakaisip ng paraan si Loufel.
“Loufel thought of this special way to honor and to still make her beloved father be a part of the most important day of her life, and that is to wear her mom’s exact wedding dress when she married him."
Naging emosyonal si Nanay Marylou nang makita ang kanyang anak na suot ang wedding dress na kanyang isinuot apat na dekada na ang nakalilipas.
Loufel Pasaol-Sicat, suot ang 40-year-old wedding dress ng ina. Ikinasal si Loufel kay Joseph Sicat noon lamang April 11, 2022.
Suot ni Loufel Pasaol-Sicat ang wedding gown ng inang si Marylou na isinuot naman ang gown noong 1982 (insert).
Kaya naman ang traje de bodang pinaglalaruan noon ni Loufel ang naging pinakamahalagang damit na kanyang isinuot.
Hangad din ni Loufel na maipasuot ang wedding gown na ito sa henerasyong susunod sa kanya.