Pinaghahanap ngayon ng mga tauhan ng Argao Police sa Cebu ang isang lalaking hinihinalang gumahasa sa alagang baboy ni Pamela Bancale.
Si Pamela ay barangay secretary sa Brgy. Bug-ot, Argao, at matagal nang nag-aalaga ng mga baboy.
Sa panayam ng Bombo Radyo Cebu, sinabi ni Pamela na posibleng ginahasa ang kanyang alagang baboy matapos mapansin ng kanyang mister na nagdurugo ang kaselanan nito noong umaga ng July 4, 2022.
May naiwan ding shorts na panlalaki sa kulungan ng baboy na posibleng pagmamay-ari ng rapist.
Plano sana ni Pamela na gawing inahin ang kanyang alagang baboy, ngunit dahil sa naging paglapaatangan dito, posibleng ibenta na lang niya ito.
Baka aniya naapektuhan ang reproductive organ ng baboy at hindi na makapag-produce ng mga biik.
Sinabi ni Lieutenant Colonel Mark Gifter Sucalit ng Cebu Police Provincial Office (CPPO) na sakaling madakip ang gumawa ng krimen, sasampahan nila ito ng paglabag sa Republic Act 10631 o ang Animal Welfare Act of 1998, at sa Article 327 ng Revised Penal Code dahil sa malicious mischief and grave scandal.
Pursigido ang pulisya na matukoy at mahanap ang suspek dahil posible umanong sunod nitong maging target ng kahayukan ang mga kababaihan sa lugar.