Cute and very funny ang nakunang video ni Indian Forest Service officer Susanta Nanda tungkol sa isang rhino na ginising ang himbing na himbing na aso sa gilid ng daan.
Ang video na ini-upload ni Susanta sa Twitter noong November 15, 2022 ay nakakuha na ng mahigit 91K views, at 3.9K reactions at press time.
Sa simula ng video ay makikitang basta na lang sumulpot ang rhino at nilapitan ang tulog na tulog na aso.
Inamuy-amoy nito ang aso, na nagmulat ng mga mata nang maramdaman iyon.
Maoobserbahang na-shock ito sa nakitang malaking hayop na umaamoy sa kanya.
Napatahol ang aso, napatalon saka buong bilis na tumakas.
Naiwan ang rhino na tila nagtataka sa nangyari, at nagpatuloy sa marahang paglalakad.
Nilagyan ni Susanta ang video ng caption na: “If you wanted any proof that the Rhinos are really gentle.”
Tuwang-tuwa naman ang netizens sa video at kanya-kanyang comment.
Sabi ng isang Twitter user, “Nightmare for the dog.”
Komento ng isa pa, “Imagine waking up to something like that."
Ang nag-upload ng video na si Susanta ang Principal Chief Conservator of Forests (PCCF) Nodal sa Odisha, isang eastern Indian state sa Bay of Bengal.
Isang nature lover and wildlife enthusiast, recipient siya ng pinakamataas na award sa forestry sa India noong 2007 dahil sa kanyang malaking kontribusyon sa forest and environment sector sa kanyang bansa.
Marami pa siyang uploaded videos ng animals sa kanyang Twitter account.