A “profession filled with love," ang paglalarawan ni Nianan, isang 40-year-old Chinese woman, sa kanyang trabaho bilang “full-time daughter.”
Sumusuweldo siya ng 4,000 yuan o halos PHP32,000 kada buwan mula mismo sa kanyang mga magulang.
Ilan sa kanyang mga trabaho ay one-hour dancing sa umaga at pagluluto ng dinner sa gabi, kasama ng kanyang mga magulang.
Kaakibat din nito ang regular na pamimili ng groceries, pag-organisa ng isa o higit pang family trips monthly, at pagda-drive para sa mga ito saan man sila pumunta.
Siya rin ang nag-aasikaso ng mga “electronic-related matters.”
Ayon sa ulat ng South China Morning Post (SCMP), tumaas ang stress level ni Nianan dahil sa mga pagbabago at pagiging highly-competitive ng job market sa China.
Kaya’t iminungkahi ng kanyang mga magulang na lisanin nito ang news agency kung saan siya nagtrabaho sa loob ng labinlimang (15) taon at mamasukan na lamang sa bahay bilang full-time daughter.
“Why don’t you just quit your job? We’ll take care of you financially.”
Ang kanyang suweldo ay buhat sa mahigit 10,000 yuan o halos PHP80,000 na pension na tinatanggap ng kanyang mga magulang.
THE 996 JOB CULTURE IN CHINA
Usap-usapan ang pagiging notorious ng 996 work culture sa China. Ito ay ang patungkol sa pag-require sa mga empleyado na magtrabaho mula 9 ng umaga hanggang 9 ng gabi, 6 na beses sa isang linggo (kaya 996) para sa kabuuang 72 work hours.
Ayon sa New York Times, nagsimula ang work culture noong 2016 sa sektor ng Teknolohiya sa kainitan ng kompetisyon ng China sa Silicon Valley ng America.
Noong una ay sang-ayon ang mga manggagawa na magtrabaho nang sobra sa oras kapalit ng overtime pay.
Ngunit kalaunan ay umalma ang mga ito.
Nasasakripisyo umano ang kanilang kalusugan, at tulad ni Nianan, marami ang nakakaranas ng burnout at depression.
May ilan pang naitalang namatay dahil sa pagiging overwork, habang ang iba naman ay dahil sa suicide.
Mayroon ding nagreklamong sinisira umano ng 996 culture ang kanilang work-life balance at itinuturing na “brutal” ng ilan.
Kaya’t bagamat kinakatigan ito, partikular ng mga tech billionaires tulad nina Alibaba founder Jack Ma at JD.com chief Richard Liu, ginawa nang illegal ang 996 work hours sa bansa simula pa noong 2021.
Ayon sa bbc.com, naglabas ng warning ang Chinese authorities base sa “10 court decisions related to labour disputes,” kung saan ang mga empleyado ay pinupuwersang magtrabaho nang sobra sa oras.
Natalo sa mga kasong ito ang mga may-ari ng kumpanya dahil, ayon sa batas, ang bawat manggagawa sa bansa ay mayroong karapatan sa “corresponding compensation and rest times or holidays.”
Dagdag na rason: “Complying with national working hours is the obligation of employers."
Base sa existing labor laws sa China, walong oras kada araw ang standard working hours.
Bawat karagdagang oras ay nararapat na tumbasan ng overtime pay, ngunit hindi pa rin ito dapat na sumobra sa nakatakdang maximum na 44 hours kada linggo.
Sa kabila ng mahigpit na warning, maraming kumpanya ang hindi tumalima at patuloy na nagpapataw ng “grueling work hours” para sa kanilang mga empleyado.
Bukod sa 996 culture, may mga bulung-bulungan din tungkol sa “mattress culture,” kung saan ang mga empleyado ay napipilitang matulog sa kanilang workplace.
Ang mga ito ang itinuturing na susi sa mabilis na pag-angat ng ekonomiya ng bansa at pagiging popular sa “world stage.”
Kaya’t ang mga manggagawang hindi maka-adapt sa kultura ay naghahanap na lamang ng alternatibong pagkakakitaan.
Bukod sa pagiging full-time daughter, mayroon ding nagtatrabaho bilang digital nomad o yung mga kumikita remotely, gamit ang Internet at technology, habang nagta-travel.
Mayroon din umanong nag-a-adapt sa “FIVE” lifestyle o “financially independent while voluntarily employed.”
LESS STRESS BUT LESS INCOME AS WELL
Bagamat “dream job” ang pagiging full-time daughter para sa karamihan, aminado si Nianan na hindi nawawala ang kanyang mga agam-agam.
Ayon sa kanya, “The biggest source of pressure is still the desire to earn more money.”
While the job is actually relaxing at malayo sa karaniwang pressure at traditional work constraints, naroon pa rin ang career-driven competition.
Nakahanda naman umano ang mga magulang ni Nianan na hayaan siyang maghanap ng mas magandang employment opportunity.
“If you find a more suitable job, you can go for it. If you don’t want to work, just stay at home and spend time with us,” mensahe ng mga magulang kay Nianan.