Umuwi si Francis McGuirk sa kanyang bahay sa Sandwich, isang bayan sa Dover District ng Kent na nasa south-east England, nitong June 25, 2023.
Walang tao noon sa bahay na pag-aari nila ng kanyang misis na si Sarah.
Si Francis ay isang 50-year-old professional golfer.
Noong mga panahong iyon ay on the rocks na ang relasyon nila ni Sarah, at nasa proseso na sila ng paghihiwalay.
Mayroon silang tatlong anak na babae.
Nang makapasok sa loob ng bahay ay nagkulong doon si Francis.
Nagpadala siya ng voice message kay Sarah na susunugin niya ang kanilang bahay.
Sinabi rin niya sa voice message na ihahagis niya palabas ng bahay ang kanilang alagang asong si Dolly para hindi iyon madamay sa sunog.
Hindi siya nagbibiro dahil pagkatapos niyang magpadala ng mensahe, sinindihan na niya ang bahay na nasa seafront lot at nagkakahalaga ng US$1.4 million o PHP81,789,400.
Mabuti na lamang at may nakapansing mga kapitbahay, na kaagad nakatawag ng firefighters.
Read: Judge officiates wedding of criminal soon after sentencing
MILLIONAIRE GOLFER BAKIT SINUNOG ANG SARILING BAHAY?
Nademanda si Francis, at dininig ang kanyang kaso.
Sa ulat ng Kent Online, isang local news website, last June 22, sinabi ni Prosecutor Caroline Knight na nasa dinner party si Sarah nang mangyari ang insidente.
Alam umano ni Francis na sa mga oras na ginawa nito ang pagsunog sa bahay ay walang ibang tao roon.
Matapos isarado ang mga pinto ay sinimulan nitong sunugin ang bahay gamit ang cooking oil.
Nang hindi agad maging successful, sinindihan naman nito ang mga sofa sa living room gamit ang lighter fluid.
Nang dumating ang mga firefighters na tinawagan ng mga kapitbahay, nakita ng mga ito si Francis na nasa labas ng nasusunog na bahay.
Kakatwa umano ang mga ikinikilos nito.
Ayaw ring magpagamot ni Francis sa mga paso nito sa katawan, at tinangka pang pumasok sa nasusunog na bahay para iligtas ang asong si Dolly.
Read: Wife pays house rent to millionaire husband
Sa testimonya ng isang bumbero na unang dumating para mag-apula sa sunog, sinabi umano sa kanya ni Francis na sinunog nito ang bahay para walang makinabang dito kapag naghiwalay na silang mag-asawa.
Bulalas umano ng pro golfer: “I didn’t want the b***h to have everything.”
Malaki ang naging pinsala sa bahay nina Francis at Sarah.
Natupok ang mga kuwarto, bagaman at naapula ng mga firefighters bago tuluyang naabo ang kabuuan ng property.
Nailigtas din ng mga ito ang family dog na si Dolly.
Read: Husband discovers wife is a male 12 days after wedding
ANG DEPENSA NG LEGAL TEAM NG MILLIONAIRE GOLFER
Sa ginawang paglilitis kay Francis, sinabi ng kanyang mga abogado sa korte na ang kanyang ginawa ay isang “genuine suicide attempt.”
Mayroon din umano siyang serious psychiatric problems dahil sa napipintong paghihiwalay nila ni Sarah.
Mula rin nang sunugin niya ang kanilang bahay, hindi na niya nakita ang tatlong anak.
Ipinagdiinan din ng kanyang legal team na isang professional golfer si Francis, at plano niyang makabalik sa paglalaro kapag natapos na ang kaso.
Dati na siyang napabilang sa top 700 golfers sa buong mundo.
Marami ring mga kilalang personalidad ang humarap sa korte at nagpatunay na kailanman ay hindi naging public risk si Francis.
Inilarawan siya na: “had a low risk of reoffending and was essentially of previous good character.”
Read: Wife upset about engagement ring gifted by husband
BAKIT HINDI NAKULONG ANG MILLIONAIRE GOLFER?
Last June 21 ay ibinaba na ng Canterbury Crown Court ang desisyon sa kaso.
Kinatigan ng korte ang depensa ng legal team ni Francis na ang kanyang ginawa ay “genuine suicide attempt.”
Ito ay kahit kumbinsido ang judge na humawak ng kaso na sadyang sinunog ni Francis ang bahay para pasakitan ang kanyang asawang si Sarah, at nagdulot iyon ng distress sa kanilang pamilya lalo na sa kanilang mga anak.
Ayon sa judge ay ikinonsidera ang claim ng mga abogado ng nasasakdal na plano niyang kitilin ang sariling buhay nang araw na mangyari ang insidente dahil sa stress na dulot ng paghihiwalay nila ni Sarah.
“It was based on spite—that being said, culpability is affected considerably by his mental state at the time,” ayon sa bahagi ng desisyon ng korte.
Dahil doon, hindi nakulong si Francis at pinatawan lang ng suspended two-year sentence.
Pinagbabayad din siya ng PHP1,000,781.93 bilang danyos.
Gayunpaman, binalaan siya ng korte na anumang offense ang gawin niya sa loob ng dalawang taon ay sapat para idiretso na siya sa bilangguan.