Nabiktima ng mga magnanakaw si Lola Raynalda Serdoncillo, 71, noong madaling-araw ng November 15, 2025.
Residente si Lola Raynalda ng Barangay Daang Bakal, Mandaluyong City.
Isa siyang store owner.
Sa kopya ng CCTV na galing sa isang nagngangalang Jhoanne Tutanes, makikita ang dalawang magnanakaw sa eskinita na naghahanap ng mabibiktima.
Saglit pa, solong naglakad ang isa habang nagsilbi namang lookout ang isa pa.
Dito na nakita ng magnanakaw ang puwesto ni Lola Raynalda—na noong mga sandaling iyon ay natutulog sa sofa.
Read: Influencer spends PHP33M on hyaluronic acid shots for 8-pack abs
MAGNANAKAW UNANG NAKUHA ANG CELLPHONE NG LOLA
Kitang-kita sa CCTV ang pagpasok ng magnanakaw sa loob ng tindahan.
Kaswal itong naglakad sa loob.
Maya-maya ay may dinampot ito sa bandang paanan ni Lola Raynalda—na wala pa ring kamalay-malay sa nangyayari.
Ang cellphone pala ng matanda ang nadampot ng magnanakaw at inilagay sa shorts nito.
Pagkatapos, lumabas na ang magnanakaw.
Read: Man receives coworkers’ salaries due to glitch; keeps the money
CASH BOX NG LOLA BINALIKAN NG MAGNANAKAW
Tila nag-report pa ang magnanakaw sa kasamahan, at muli itong bumalik sa loob ng tindahan.
Sa pagkakataong ito, tinangka niyang kunin ang kahon ng sapatos o cash box sa ulunan ni Lola Raynalda.
Nagkataon namang biglang may kumanta, kaya nagmadaling ibinalik ng magnanakaw ang kahon sa dating puwesto.
Napaupo rin ito sa sofa na kinahihigaan ni Lola Raynalda, na biglang naalimpungatan.
Sa halip namang mataranta, nagtangkang magmano ang magnanakaw sa nagtatakang si Lola Raynalda—saka ito nagmamadaling tumalilis.
Hinabol ito ng matanda hanggang sa pintuan ng tindahan.
Read: Victim loses PHP20M after falling for fake Squid Game star online
CASH BOX NG LOLA MAY LAMANG PHP10K
Sa panayam ni Lola Raynalda sa media, sinabi niyang tulog siya noong nangyari ang pagnanakaw sa kanyang tindahan.
“Bigla akong nagising. Nakita ko na lang yung mama nakaupo rito, magmamano siya.
“Sabi ko sa kanya, ‘Anak ng… sino ka?’
“Tapos, bigla siyang lumabas.”
Ayon pa kay Lola Raynalda, PHP10,000 ang laman ng kahong muntik nang matangay ng magnanakaw.
“Bumalik pa siya tapos kukunin yung lalagyan ng pera.”
Buti na lang aniya at may dumating na kumakanta kaya nagulat ang magnanakaw at ibinalik ang kahon ng pera.
Sambit ni Lola Raynalda: “Sana humingi na lang kung talagang nangangailangan, hindi yung magnanakaw pa siya.”
Nagpapasalamat siya sa Diyos na walang nangyari sa kanya.
Read: Husband to pay "cat support" to wife for 10 years after divorce
DALAWANG MAGNANAKAW NAKILALA NA NG MGA AWTORIDAD
Kuwento naman ng anak ni Lola Raynalda na si Jingle, sobrang casual ang kilos ng magnanakaw kahit nagising na ang kanyang ina.
“Yung paglabas niya [magnanakaw], hindi naman siya tumatakbo.
“May kahoy dito, humakbang lang din talaga siya, tapos naglakad.”
Agad din namang nakilala ang dalawang magnanakaw.
Residente ang mga ito ng Barangay Addition Hills.
Kilalang notorious na kawatan ang dalawa sa kanilang lugar.
Agad nakipag-ugnayan ang mga opisyal ng Barangay Daang Bakal sa mga barangay tanod ng Barangay Addition Hills.
Kasama ang mga pulis, pinuntahan nila ang bahay ng mga suspek ngunit wala na ang mga ito.
Naglabas na rin ang pulisya ng warrant para tuluyang maaresto ang dalawang kawatan.
Read: Kidnapped at 4, man draws map from memory and finds his way home