Ang pelikula ni Brillante Mendoza na Ma'Rosa ang official entry ng Pilipinas sa Best Foreign Language Film category ng 89th Academy Awards o mas kilala bilang Oscars sa darating na February 2017.
Sa pelikulang ito nanalo ang GMA-7 actress na si Jaclyn Jose ng Best Actress award sa 68th Cannes Film Festival na ginanap noong May 2016.
Kabilang sa Oscar committee ng FAP na pumili sa pelikula ay ang director/editor na si Edgardo Vinarao, director/scriptwriter na si Jose N. Carreon, film director Mike Sandejas, ang cinematograoher na si Lee Briones-Meily, ang aktres na si Cheri Gil, ang aktor na si Michael de Mesa, at director/scriptwriter na si Eddie Rocha.
Bago ang official announcement ng FAP, naging maugong din ang Oscar buzz para naman sa pelikula ni Lav Diaz na Ang Babaeng Humayo matapos nitong maiuwi ang Golden Lion award sa 73rd Venice Film Festival.
Ilan sa mga film critics at netizens ay ikinalungkot ang naging desisyon ng FAP dahil mas karapat-dapat daw ang pelikula ni Lav ang ipasa sa Oscars dahil nanalo na ito ng top prize sa Venezia.
Nakapanayam ng PEP.ph (Philippine Entertainment Portal) at iba pang miyembro ng media si Charo sa grand press conference ng kanilang pelikula na ginanap sa Dolphy Theater, ABS-CBN compound kahapon, September 21.
Sa isang bahagi ng Q&A, tinanong ang ABS-CBN Chief Content Officer kung ano ang naramdaman nito nang hindi mapili Ang Babaeng Humayo bilang entry ng Pilipinas sa Oscars.
Ayon kay Charo, ikatutuwa rin nito kung sakaling ang pelikula nila ang napili ngunit tinatanggap niya ang naging desisyong ng FAP.
Aniya, "Siyempre it would have been great if our film was chosen pero iba-iba ang panlasa ng tao, e, iba-iba ang panlasa natin and you accept that."
Dagdag pang paliwanag nito, "May pagka-philosophical kasi yung tingin ko sa buhay, e, kung nauukol, e di, okay. Kung hindi naman, just go with the flow and move on and we should just all be happy for Ma'Rosa."
Sa hiwalay na panayam, sinabi rin ni Charo na suportahan na lang ang pelikulang napili ng FAP para ipadala sa Oscars.
Pahayag nito, "It's not in our control. There's a selection committee and this is with the Film Academy of the Philippines, to make the decision. Sinabi ko nga earlier na iba-iba ang pagtingin natin, e, iba-iba ang panlasa natin so let's respect that. Let's just support the film they have chosen."
Ang isa pang paraang kinokonsidera para makapasok sa Oscars ang pelikula ni Lav ay kung magkaroon ito ng release sa Amerika. Ayon sa Cinema One Channel Head na si Ronald Arguelles, mayroon na daw silang foreign distributor at kasalukuyan na nila itong pinaghahandaan.
Ani Ronald, "Yung pagkakaroon ng Oscar buzz, depende yun kung maipapalabas ng regular theatrical screening sa Amerika. Kung maipapalabas dun, magkakaroon ng campaign din."
Patuloy nito, "Right now, wala pa yung sa U.S. Tinatanong ko pa rin sila tungkol dun and kinukulit ko na rin."