Kahit
nasa loob ng bahay ni Kuya bilang isang celebrity housemate ay nagawa pa rin ni
Gaby dela Merced na mag-champion sa Subic International Raceway noong Linggo, October 28.
Alam ni Big Brother na lubhang mahalaga ang pangagarera para sa kanyang housemate na tinaguriang Racing Goddess kaya kahit nakakulong sa loob ng bahay ay binigyan niya ito ng pagkakataon na makabalik uli sa race tracks kahit isang araw lang. Naka-blind fold si Gaby na lumabas ng PBB house. Pagdating niya sa race tracks saka lang tinanggal ang piring sa mata niya pero siniguro naman ni Big Brother na limitado lang ang contact niya sa outside world at ang maari lang niyang kausapin ay ang kanyang chief engineer/engine turner na si Mr. Dominique Cuesta, at tungkol lang sa kotse at karera.
Hindi rin naman binigo ni Gaby si Big Brother. Naiuwi ng sexy race car driver ang tropeo bilang champion sa Subic International Raceway kahit nagkaroon ng problema ang kotse niya. Umusok ito habang humaharurot sa kalagitnaan ng elimination rounds. Nang palitan ang makina nito ay ayaw namang mag-start dahil sira ang baterya. Pero all's well that ends well, kaya nakarating din sa finish line ang racer at naging champion pa.
Malaking karangalan ito para kay Gaby at kay Big Brother, lalo na't ang mga kalaban niya ay ang 2005 Philippine Touring Car Class "B" Champ na si Dennis Uy, at 2004 Driver of the Year Luis Ramirez, na pareho niyang hinahangaan. Si Gaby ang kaisa-isang babaeng nakipagkarera nang araw na iyon.
H.O.H. CHALLENGE. Subalit hindi doon nagtatapos ang laban ni Gaby dahil nang sumunod na araw ay muli siyang binigyan ni Kuya ng isang matinding challenge. Ito ay ang pakikipagkarerahan sa mga housemates sa kauna-unahang H.O.H. Grand Prix sa activity area.
Hindi na ito ni kinaya ng champion ng karerahan, kasi ba naman mga go-kart na pambata ang gamit nila! Ni hindi naka-qualify si Gaby para sa finals; siya pa ang lumabas na kulelat sa elimination round laban kay Ruben Gonzaga ng Davao at ang bokalistang si Mcoy Fundales.
Sa final round, si Ruben, Will Devaughn, at Riza Santos ang naglalaban-laban. Inasahan kaya ni Big Brother na tatalunin ni military girl na beauty queen ang isang hunk at isang komedyante? Walang kalaban-laban ang dalawang lalake. Hindi kaya dahil sa na-rattle sila sa kaseksihan ng kanilang kalaban?
Sa ibang salita, ang Desirable Diva na si Riza ang nanalo sa race. Dahil dito, siya ang tinanghal na Head of Household para sa linggong ito. Bilang HOH, anu-anong pribilehiyo kaya ang matatanggap ni Riza maliban sa mga pribilehiyong namana niya sa unang HOH na si Ethel Booba?
At sa susunod na nomination night, sino kaya ang pipiliin ng magandang HOH na gawaran ng automatic nomination? Paano niya kaya pangungunahan ang mga housemates para wagi na naman sila sa kanilang weekly task na "Gising na Gising" kung saan 25 oras lang dapat ang tulog nila sa buong linggo? Kailangan nilang manalo sa weekly task na ito dahil tinaya nila ang 100% ng kanilang budget para sa challenge na ito.
Abangan ang mga susunod na kaganapan sa loob ng bahay ni Kuya. Makibahagi sa buhay ng mga celebrity housemates gabi-gabi sa Pinoy Big Brother Celebrity Edition 2 sa Primetime Bida. Sumagap din ng mas maagang chika sa PBB Celebrity 2 Uber tuwing 5:30 ng hapon mula Lunes hanggang Biyernes.