Nagpahiwatig ba si John Lloyd Cruz na para sa isang proyekto ang pagkikita nila ni Bea Alonzo?
Nitong Linggo, June 16, nagbahagi si John Lloyd sa Instagram ng ilang larawan nila ni Bea habang nasa may beach front kasama ang ilan pang katao.
Dito ay makikitang nag-uusap si John Lloyd at ang nakatalikod na si Bea.
Nag-post din si John Lloyd ng ilan pang larawan na tila behind-the-scenes.
Karamihan sa mga shot ay sa may dagat kinunan. May kuha ring nakasakay sila sa bangka at ang isa naman ay sa yacht.
Base sa post ng fans ng dalawa, kinunan ang mga larawan sa Palawan.
Hindi naman tukoy kung ito ba ay para sa isang proyekto o endorsement.
Sa interview ni Bea na umere sa TV Patrol nitong June 15, Sabado, hindi rin niya ibinunyag kung para saan ang pagkikita nila ng perennial leading man.
JOHN LLOYD AND BEA ON THE SET
Pero base sa maiksing caption ni John Lloyd ngayong Linggo, June 16, matutukoy na para sa isang produksiyon ang pagsasama nila muli ni Bea.
“Set namin,” simpleng caption ng aktor.
Sa isa pang nag-leak na video online na ibinahagi ng fans nina John Lloyd at Bea, mapapanood ang pagbibigay ng instructions ng isang tao—na posibleng direktor—para sa blocking ng isang eksena kung saan kasama sina John Lloyd at Bea at tila mga extra.
Makikita rin sa video na may camera na naka-mount sa tripod ilang talampakan mula sa kinauupuan ng former love team.
Unang nakilala ang tambalan nina John Lloyd Cruz at Bea Alonzo sa 2002 ABS-CBN teleserye na Kaytagal Kang Hinintay.
Kabilang pa sa mga pinagtambalan nilang teleserye ay ang It Might Be You (2003), Maging Sino Ka Man (2006), Maging Sino Ka Man: Ang Pagbabalik (2007), I Love Betty La Fea (2008), at A Beautiful Affair (2012).
Sa pelikula naman, karamihan sa mga pinagtambalan nilang pelikula ay box-office hits kagaya ng One More Chance (2007), Miss You Like Crazy (2010), The Mistress (2012), at A Second Chance (2015).