Hindi pinansin ni Manila Mayor Isko Moreno ang tila pasaring sa kanya ni Jerika Ejercito, anak ng natalo niyang katunggali sa pagka-mayor ng Maynila na si dating Presidente at former Mayor Joseph "Erap" Estrada.
Nitong nakaraang Sabado, July 6, nag-share si Jerika ng isang Facebook post kung saan kinuwestiyon kung papaano na mamumuhay at kung saan na kukuha ng kanilang source of income ang vendors sa Divisoria ngayong ipinatupad ni Mayor Isko ang clean-up drive sa naturang sikat na pamilihan.
Hindi ikinatuwa ng maraming netizens ang tila pagkontra ni Jerika sa adhikain ng bagong alkalde ng Maynila na malinis ang mga pangunahing lansangan ng capital city ng bansa, lalo na sa Divisoria.
Pinupog ng komento ang artikulong lumabas dito sa PEP.ph (Philippine Entertainment Portal) tungkol sa Facebook share ni Jerika.
Si Jerika ay anak ni Erap sa dating aktres at beauty queen na si Laarni Enriquez.
Tumakbo rin siyang konsehal sa isang distrito ng Maynila nitong nakaraang halalan, ngunit natalo siya.
MAYOR ISKO MORENO: "GOOD LUCK."
Sa panayam ng Bandila ng ABS-CBN kay Mayor Isko kagabi, July 8, tinanong ng news anchor na si Julius Babao ang actor-turned-public servant tungkol sa isyu sa paglilinis ng Divisoria.
Atubili noong una na sagutin ni Mayor Isko ang tanong.
Tanging nasabi lang niya, "Good luck. Yun na lang."
Kasunod nito, idinetalye ni Mayor Isko ang ilegal na transaksiyon ng vendors at ang mga namamalakad na pulis sa Divisoria.