Kahit straight na lalaki siya, sinabi ni Christian Bables na ini-enjoy na niya ang mga gay roles na napupunta sa kanya.
Una na nga rito ang sa Die Beautiful at ngayon ay sa The Panti Sisters.
Wala daw problema na ma-typecast na siya sa mga ganitong role.
Sabi pa niya, “Hindi. Kagaya nga ng sinasabi ko, hangga’t humihinga, may puso, may kaluluwa yung character na ipu-portray ko, gagampanan ko yan.”
Ngayon nga ay naturingan na “baklang kanal” ang kanyang bagong karakter.
Ano nga ba ang ibig sabihin nito?
Nakangiting sagot ni Christian, “Ito yung walang patumanggang magsalita, walang pakialam sa mga tao, kung may hurtful word siyang masabi.”
May inspirasyon ba siya sa kanyang “baklang kanal” na karakter?
Tugon niya, “Wala naman akong na-meet personally.
“Ginawa ko siya kung papaano... kung ako yung baklang kanal.
“So, this is my version.”
Ang The Panti Sisters ay entry sa Pista ng Pelikulang Pilipino (PPP) 2019 at mapapanood na sa mga sinehan sa darating na September 13.