Naaksidente ang actor-model na si Troy Montero habang nakikipagkarera sa Vios Cup ngayong Sabado, August 31.
Base sa Facebook Live ng Vios Cup, papunta na sa finish line ang kotse ni Troy nang bigla itong bumilis at bumangga sa likod ng kotse ng kapwa-racer niyang si John Dizon.
Agad namang sumugod ang mga medic para i-rescue ang dalawang racer.
Nakababa nang maayos si Dizon mula sa kanyang sasakyan, habang si Troy ay tinulungan ng mga medic na makababa mula sa kanyang kotse.
Inihiga rin si Troy sa stretcher at isinakay sa ambulansya.
Ayon naman sa mga commentator na sina Apple David at James Deakin na nagsasalita sa Facebook Live ng Vios Cup, hindi naman daw malubhang nasaktan si Troy dahil sa aksidente.
Agad ding inalis ang mga nasirang sasakyan sa race track.
Bukod kay Troy, kalahok din sa karera ang asawa nitong si Aubrey Miles.
Sa kasalukuyan ay wala pang balita kung ano ang kalagayan ni Troy pagkatapos ng aksidente.