Dismayado si Ice Seguerra dahil ginagawang katatawanan ng iba ang apela ng transgender people na magkaroon ng gender-neutral comfort rooms sa bansa.
Kaugnay ito ng SOGIE (Sexual Orientation and Gender Identity and Expression) Equality Bill na naglalayong bigyang proteksiyon ang LGBTQIA+ (lesbian, gay, bisexual, transgender, queer, intersex, asexual) community laban sa diskriminasyon.
Ang sexual orientation ay tumutukoy sa kasarian ng isa tao base sa kung nagkakagusto ito sa opposite sex o kapwa-babae o kapwa-lalaki.
Ang gender identity ay tumutukoy sa kasariang kinikilala ng isang tao, mapa-lalaki, babae, o LGBT member.
Taong 2017 ipinasa sa Kamara ang SOGIE Equality Bill, na kasalukuyang pinag-aaralan ito sa Senado.
Sa Facebook post ni Ice kahapon, August 31, naglabas siya ng hinaing dahil may ilang straight people at miyembro ng LGBTQIA+ community na minamaliit ang isyu sa CR ng transgender men and women.
"It pains me to see posts from friends especially from the LGBTQIA+ community na parang galit pa sa transpeople because we are speaking up about this.
"Pinagtatawanan kami, posting memes, and worse, speaking up against supporting the SOGIE Bill kasi hindi naman daw nila naranasan ang diskriminasyon so hindi nila kailangan.
"Swerte kayo kasi whenever you feel like going to the toilet, you can easily go without people questioning you."
Minsan nang naikuwento ni Ice na personal niyang naranasang mapalabas ng women's CR sa Arab countries na napuntahan niya dahil hindi tanggap ang gaya niyang transgender man na magbanyo kasama ng mga babae.
Kung sa men's CR naman daw ay ang dami pang kumukuwestiyon sa kanya.
Patuloy pa ni Ice: "Hindi niyo kailangan magpigil uminom ng tubig sa pag nasa labas kasi may trauma ka na magbanyo.
"Swerte kayo. Pero hindi lahat swerte. Hindi lahat may boses at impluwensiya kagaya ninyo.
"Hindi lahat ay kayang tumayo at ipaglaban ang sarili nila. Swerte po kayo. Paano yung mga hindi?"
Paliwanag pa ni Ice, hindi biro ang hirap sa simpleng pagbanyo dahil lang sa panghuhusga sa sexual orientation at gender identity ng isang tao.
"The comfort room issue is a concern for those of us who haven't fully transitioned.
"Concern ito for those of us who know we are transgender but are being clocked (or looked at) because our features don't look man or woman enough sa standards ng karamihan.
"Like I said, it is a concern that one cannot fully understand unless you've been in this position."
Sa kasagsagan ng isyu, hindi rin daw maintindihan ni Ice kung bakit biglang naglaganap ang takot ng ibang straight people na may makasabay na transgender sa CR.
Na tila raw may nakaambang panganib kaagad sa ganitong sitwasyon.
"Sa totoo lang, and I am 100% sure, marami na pong transgender people ang nakakasama ninyo sa comfort rooms.
"Hindi niyo lang alam or napapansin because they have already transitioned (nakakapag take na ng hormones, probably gender reassignment surgery).
"Hindi kayo maiilang because they already look female or male. Ika nga, nakapag 'blend in' na sila sa mata ng mga tao.
"Before this issue came out, wala naman kayong naririnig na mga transpeople harrassing other people in comfort rooms.
"Because we go there for the very same reason na nagbabanyo kayo. Kailangan namin umihi at dumumi, mag re-touch at magpapogi."
Sa huli, humiling si Ice na sana ay tigilan na ng netizens na gawing katatawanan ang apela ng mga transgender na magkaroon ng gender-neutral CR.
"We are not disregarding your feelings or reservations about this issue.
"Kaya nga ang hiling namin ay sana may gender-neutral comfort rooms din. Para walang mailang on both sides.
"And siguro, malawakang pag-intindi sa kung ano ba ang kaibahan ng sexual orientation at gender identity."
Sana raw ay maniig ang respeto at pang-unawa sa bawat isa.
"So to my dearest straight and LGBT+ friends, don't laugh at us.
"This issue may not concern you personally but it doesn't discount the fact that we are here, there's a lot of us and we go through this everyday."