Kahit parehong artista sina Marian Rivera at Dingdong Dantes, hindi raw nila ini-encourage na mag-showbiz ang kanilang mga anak na sina Zia, 3 years old, at Ziggy, 5 months.
Sa contract signing ni Marian ng kontrata bilang Mega Prime ambassador sa ikatlong pagkakataon noong Martes, September 24, inusisa siya ng PEP.ph (Philippine Entertainment Portal) at ilan pang reporters kung papayagan nilang pumasok sa showbiz ang kanilang dalawang anak.
Noong una ay umiwas si Marian na sagutin ito.
Pero kalaunan, ipinaliwanag niya ang kanyang pananaw tungkol sa usaping ito.
Saad ng Kapuso Primetime Queen, “Showbiz? A, sabi ko nga, magtapos...
"Kami ni Dong talaga, magtapos muna sila ng pag-aaral.
“Sabi naman namin, kung ano yung gusto nila, kung ano yung daloy ng dugo nila, kung ano yung naramdaman nila, susuportahan namin sila sa lahat ng gusto nila.
“Pero ang hiling lang namin ng tatay niya is magtapos sila ng pag-aaral nila.”
Sa ngayon, may endorsements na ang panganay nila ni Dingdong na si Zia.
Sabi ni Marian, isinasangguni nila sa bata kung gusto nitong gawin ang isang endorsement.
Kung ayaw nito ay hindi nila pinipilit ang bata.
Ano naman ang reaksiyon ni Marian sa mga taong nagsasabing pinagtatrabaho na nila ang kanilang panganay na anak sa murang edad nito?
Nakangiting sagot ni Marian, “Of course not, may sariling bangko yung anak ko.”
Biro pa niya kung sino ang mas may malaking kinikita sa kanilang mag-ina sa endorsement, “Parang quits kami, choz.”