Tanggap ni Zanjoe Marudo ang pagkaligwak ng pelikulang Isa Pang Bahaghari sa 45th Metro Manila Film Festival.
“Ewan ko. Siguro, may kanya-kanya namang reason kung ano ang kailangang ipasok at hindi. Nirerespeto ko yun,” sabi ni Zanjoe.
Nanghinayang ba siya?
“Hindi naman,” tugon ng aktor, na gumanap bilang panganay na anak nina Nora Aunor at Phillip Salvador sa nasabing pelikula na idinirek ni Joel Lamangan.
“Kasi, sobrang proud ako sa project na ito. Sobrang proud na proud kaming lahat dahil napakaganda ng pelikula."
Nakapanayam ng pep.ph (Philippine Entertainment Portal) ang Kapamilya actor sa Black Magic Halloween Party noong Oktubre 20, Linggo, sa Resorts World Manila.
Abala rin si Zanjoe sa shooting ng digital project nila nina Jodi Sta. Maria at Ian Veneracion para sa iWant TV.
Si Jodi ang producer nito.
“Masaya kasi sobrang light nung story saka siyempre, para makatrabaho sina Jodi and Ian.
“First time ni Jodi para mag-produce, so, excited ako,” sambit ni Zanjoe.
