Sa isang bihirang pagkakataon, nagsama sina Daniel Padilla at James Reid sa isang after party sa Rome, Italy nitong nagdaang weekend.
Hindi maiwasang ma-excite ang fans ng dalawang Kapamilya heartthrobs na itinuturing bilang onscreen rivals dala ng kani-kanilang love teams.
Si Daniel ay kalahati ng tambalang KathNiel, ang uni-name nila ng reel-and-real-life sweetheart niyang si Kathryn Bernardo.
Si James ay kalahati ng tambalang JaDine, ang uni-name nila ng reel-and-real-life sweetheart niyang si Nadine Lustre.
Kahapon, November 17, kumalat ang video kunsaan hinihikayat si Daniel ng ilang G-Force dancers na sumayaw sa isang after party.
Pero halatang todo-tanggi si Daniel dahil hawak siya sa magkabilang-kamay ng dalawang G-Force dancers at isa sa mga ito ay sinusubukan pang kunin ang hawak na baso ni Daniel.
Nakatayo sa tabi si James, at maya-maya pa ay niyakap ang nakatalikod na si Daniel para hindi ito makawala habang hinihila sa dance floor.
Pagdating sa gitna ng function room, pinagbigyan din ni Daniel ang mga kasama at bahagyang umindak kahit halatang hindi niya forte ang pagsasayaw.
Parehong game at nakangiti sina James at Daniel habang nagkakasiyahan ang kanilang grupo.
Bukod dito ay nakunang magkatabi sina Daniel at James sa group picture ng Kapamilya stars, base sa Instagram post ni Dimples Romana.
Naroon din ang girlfriend ni Daniel na si Kathryn pati na sina Jodi Sta. Maria, Zanjoe Marudo, KZ Tandingan, Moira dela Torre, at ibang kasama.
NETIZENS KILIG OVER JAMES and daniel
Hindi naman magkamayaw ang fans nina James at Daniel na makitang magkasama ang dalawang Kapamilya actors.
"Kakilig," "cuties," at nakakataas daw ng "energy" ang mga ito.
May nagbiro pa na bigyan ng uniname na JaNiel ang kinakikiligan nilang sina James at Daniel.
May ilan ding fans si Daniel na natuwa dahil pinagbigyan pa rin daw nito ang grupo at pinakita ang kanyang "lolo dance moves."
May isa ring netizen ang nagtanong kung kailan naman daw kaya makikitang magkasama sina Kathryn at Nadine.
