Subsob sa pag-aaral ngayon ng salitang Waray at Ilocano sina Barbie Forteza at Kate Valdez para sa kanilang roles sa bagong Kapuso teleserye na Anak ni Waray vs. Anak ni Biday.
Ang Anak ni Waray vs. Anak ni Biday ay ang 1984 Maryo J. delos Reyes movie na pinagbidahan nina Maricel Soriano at Snooky Serna. Ginampanan nila ang papel bilang mga anak ng original Waray at Biday na sina Nida Blanca (Inday Waray) at Manang Biday (Gloria Romero).
Sa 2019 TV version, si Barbie ang gaganap na anak ni Waray na unang ginampanan ni Maricel, habang si Kate naman ang gaganap na anak ni Biday na ginampanan naman noon ni Snooky.
Kasama rin nina Barbie at Kate sa pag-aaral ng salitang Waray at Ilocano si Max Collins, na may mahalagang papel sa serye, ayon din kay Barbie.
Bukod sa challenge ng pag-aaral ng lengguwaheng Waray at Ilocano, nao-overwhelm din daw si Barbie sa cast ng Anak ni Waray vs. Anak ni Biday.
"Feeling ko lagi uma-attend ako ng awards night. Kasi talagang bigatin ang mga artista!" banggit pa ni Barbie.
Kabilang sa mga malalaking pangalan na kasama sa cast sina Celia Rodriguez, Snooky Serna, Dina Bonnevie, Teresa Loyzaga, Jay Manalo, at Lovi Poe.