Ikinadismaya ng ilang netizens ang tila pagkakamali ng host na si Steve Harvey sa pag-anunsiyo na si Gazini Ganados ng Pilipinas ang nanalo ng Best National Costume sa Miss Universe 2019.
Sa segment bago rumampa ang Top 10 sa swimsuit competition, in-announce ni Steve ang nanalo sa Best National Costume.
“Here’s a look at the winner, Philippines,” sabi ni Steve.
Makikita ring nag-flash sa screen sa likod ang larawan ni Gazini suot ang kanyang Philippine eagle-inspired costume na likha ni Cary Santiago.
Pero ang katabi ni Steve ay si Miss Malaysia, suot ang kanyang Malacca-inspired national costume.
Pagputol ni Miss Malaysia sa pagsasalita ni Steve, “It’s not Philippines, it’s Malaysia…”
Ang dating nito sa mga nanonood ay si Miss Malaysia ang tunay na nanalo ng Best National Costume.
Ginanap ang grand coronation ng Miss Universe 2019 sa Tyler Perry Studios sa Atlanta, Georgia, USA, Linggo ng gabi, December 8 (Lunes ng umaga, December 9, sa Pilipinas).
Inirampa naman ng 90 candidates ang kanilang national costumes sa prelims na ginanap sa Marriott Marquis sa Atlanta, Georgia, USA, noong Sabado, December 7 (Biyernes, December 6, Philippine time).
NETIZENS DISMAYED BY THE MISTAKE
Hindi ikinatuwa ng ilang netizens ang nangyari sa announcement ng Best National Costume.
Tweet ng ilan, tila sinadya ng organisasyon ang nangyari.
Tinawag din nila itong “mockery” batay na rin sa nangyaring maling announcement ni Steve noong Miss Universe 2015 pageant.
Kahit ang Kapamilya host na si Bianca Gonzalez ay nalito.
Tweet niya: "Wait sorry am still confused. So why did Steve Harvey announce that Philippines won Best National Costume, and it was Gazini in the photo on screen, but it was Malaysia who was physically beside him? Miscomm ba? Prank ba? #MissUniverse2019
Narito ang ilan sa mga galit na tweet ng netizens:
STEVE HARVEY EXPLAINS IT’S NOT HIS FAULT
Nagpaliwanag naman si Steve sa nangyaring pagkakamali.
Aniya, binasa lamang niya ang nakasulat sa teleprompter.
Paglilinaw niya, “I just read that in the teleprompter.
“Ya’ll gotta quit doing this to me, I can read… instead, now they tryin’ to fix it.
“See, this what they did to me back in 2015, played me short like that.”
Ang tinutukoy ni Steve ay ang nangyaring pagkakamali noong Miss Universe 2015, kung saan siya rin ang host.
Sa halip kasing i-announce na si Pia Wurtzbach ng Pilipinas ang nanalo, ang tinawag niya ay si Ariadna Gutierrez ng Colombia.
Pagkatapos ng ilang minuto ay bumalik sa stage si Steve upang itama ang pagkakamali.
Depensa niya, binasa lamang niya kung ano ang nasa teleprompter na inconsistent naman kung ano ang nakasulat sa papel na hawak niya.