Emosyonal at sentimental si Congressman Alfred Vargas nang tanggapin ang parangal bilang 2019 TOYM (Ten Outstanding Young Men) for Public Service noong December 13.
“I wouldn’t be where I am today if not because of our entertainment industry,” sabi ni Congressman Alfred sa mediacon noong December 14, Sabado, sa Annabel’s restaurant, Morato Avenue, QC.
“Very sentimental ako kagabi and even until now because, siguro it’s a sort of culmination of my life’s work at the age of 40.
“Pero nagpapasalamat ako kasi, feeling ko, kung hindi rin naman ako naging isang artista, baka hindi rin ako naging Congressman.
“That’s why I’m very grateful to the Lord. He gave me the opportunity, the talent, the luck and good friends like you so that I will be able to serve our country.”
Ipinahayag din ni Alfred kung gaano niya kamahal ang bansang Pilipinas.
“Mahal na mahal ko ang bansa nating ito. I’m a Filipino and I love our country very much. Sana, we can also make a difference para lalo pa nating mapalago ang bansa na ito.”
Malaking karangalan ang makatanggap ng TOYM. Pagkatapos na ma-nominate para maging isa sa possible candidates, mistulang dumaan sa butas ng karayom ang isang nominado para makapasa bilang TOYM.
“This award means a lot to me,” lahad niya.
“Ang laki po ng ating isinakripisyo para lang po mabigyan ng pagkakataon na makapaglingkod. I sacrificed my own dreams.
“Alam po ni Nanay Lolit [Solis, his manager]. Napakaganda po ng tinatakbo ng karera natin noon, pero ginive-up po nating lahat ng dreams ko sa showbiz just to be given the chance an opportunity to help others with their dreams.
“Sabi ko nga, noong nag-artista ko, I felt so satisfied. Pero iba iyung satisfaction at fulfillment and right now, I’m very happy dahil yung sense of fulfillment, nasasamahan din ng sense of satisfaction because I can still do one project a year.”
ON HIS POLITICAL PLANS
Dahil sa kanyang inang namatay sa sakit na cancer, naging inspirasyon ito kay Alfred na isulong ang Republic Act 11215, o National Integrated Cancer Control Act.
Bukod pa rito, inihandog din ni Alfred ang award niya sa kanyang ama.
Hindi niya makakalimutan ang sinabi sa kanya ng ama niya dati.
“Well, sabi ng father ko, ‘Meron kang talento, meron ka ring looks,’ sabi sa akin ng tatay ko. ‘Malayo ang mararating mo pero unang-una, never kang magiging mayabang. Wala sa dugo natin ang kayabangan. Alalahanin mo na kapag nasa itaas ka na, huwag mong kakalimutang tumulong sa mga nasa ibaba. Yung pangarap mo, hindi ganun ka-importante. Tumulong ka na lang na yung ibang tao, maabot nila ang pangarap nila sa buhay.’”
Kilala si Alfred na may magandang record pagdating sa pagiging pulitiko, mula sa pagiging konsehal niya ng Quezon City hanggang sa ngayong nasa Kongreso na siya.
Kaya tinatanong ito kung ang susunod na tatakbuhin niya ay Senator o Presidente na.
“Wala, wala pa tayo sa ganun,” sabi na lang niya.
Sa isang banda, matunog ang balita na si Senator Manny Pacquiao ay tatakbong Presidente.
Anong masasabi niya roon?
“Well, maraming nagsasabi kasi maraming nagmamahal kay Manny Pacquiao. Actually, bayani ‘yan, e. Bayani natin si Manny Pacquiao.
“Ang masasabi ko, hindi ako nagugulat. Kasi, national figure natin si Manny Pacquiao.
“Tapos, marami na rin siyang natulungan. Yung puso niya, hindi mo rin naman makukuwestiyon dahil ang dami rin naman niyang natulungan. Pinaghirapan niya at hindi rin naman ako magugulat.”
Magkakatapat sila ni Mayor Sara Duterte?
“Hindi pa natin alam,” saad ni Alfred.
“Malay mo, magkasama sila. It’s too early to tell. Sa election, hindi natin alam, unless last few months na lang.”
Sabi pa niya, “Winnable si Manny and winnable rin si Mayor Sara.”
ON HIS MOVIE KAPUTOL
Hindi nakasama sa 45th Metro Manila Film Festival ang pelikulang ginawa ni Alfred titled Tagpuan. Ito ay drama love story kunsaan kasama niya sina Iza Calzado at Shaina Magdayao.
May isa pang pelikulang ginawa si Alfred: ang Kaputol kasama sina Cherie Gil at Angel Aquino.
Nag-premiere ito noong Lunes, December 16.
Para kay Alfred, gusto pa rin niyang makasama sa mga susunod na pelikula sa MMFF.
“Kasi, mas maraming makakapanood. Mas marami ang chance na kumita ang pelikula. Kasi, aminin natin na medyo challenging ngayon,” saad ni Alfred.
Suportado ni Alfred ang movie industry. Hindi nawawala sa puso niya ang entertainment.
Ngayong MMFF 2019, napanood na niya ang isa sa walong entry, ang Miracle in Cell No. 7 at gusto raw niyang panoorin lahat.
“Gusto ko ring panoorin yung kay Coco [Martin], kay Vice Ganda, yung Mindanao, yung Culion. I’ll try to watch the others din kasi, gusto kong makakumpleto.”
Puring-puri ni Alfred ang Miracle in Cell No. 7 na pinagbibidahan ni Aga Muhlach.
“Hindi ko napanood ang Korean kaya fresh eyes ako no’n. Kaya sabi ko, ‘Ang ganda nito, ah?!’ So, after ko na lang nalaman na ano pala siya, adaptation.
“After watching, sabi ko nga, parang ang sarap gumawa ng ganung pelikula. Ang ganda, e. Ang ganda ng role.
“At yung cast, ang galing nilang lahat.”
Hindi nagiging problema kay Alfred na napagsasabay niya ang pulitika at showbiz.
Aniya, “Never in a sense na hawak ko naman ang schedule ko. Kaya naman natin na i-manage ang schedule. Pero siguro, minsan nagko-conflict siya dahil miss na miss ko na iyung acting.
“So, I’m happy that I’m given a chance. Nakakapag-shooting ako kapag naka-recess kami. I enjoy the best of both world.”
CHRISTMAS PLANS OF ALFRED
Ilang araw na lang ay Pasko na kaya kinamusta namin siya kung ano ang plano niya ngayong Kapaskuhan.
“Bilang Congressman, nakatanggap ako ng almost 2,000 Christmas party events,” natatawang sabi niya.
“Obviously, hindi ko mapupuntahan lahat but I would like to go to those that I can, so iyun muna. Sa family, I invited my relatives na sa bahay namin mag-celebrate.
“Yung New Year, out-of-the-country kami. Si Yasmine [Espiritu] and kids. Sa Singapore siguro.
“Usually, we spend our New Year in Hong Kong, kasi, ang ganda ng fireworks. Pero dahil may baby pa kami, sabi ko, baka mag-Singapore na lang muna, segue siguro sa Legoland.”