Pagpasok na pagpasok ng taong 2020, binati ng American TV host na si Ryan Seacrest ang mga Pilipino ng Happy New Year—sa wikang Filipino!
Sa Twitter idinaan ni Ryan ang kanyang pagbati sa mga Pilipino, sa kalagitnaan ng pagho-host niya ng Dick Clark’s New Year’s Rockin’ Eve with Ryan Seacrest.
Gaya ng dati, ang annual New Year’s countdown ay ginawa sa Times Square sa New York City.
Eksaktong 12:00 ng hatinggabi nang mag-tweet si Ryan: “Maligayang bagong taon! Happy New Year to everyone in Phillipines! #2020”
Maligayang bagong taon! Happy New Year to everyone in Phillipines! #2020
— Ryan Seacrest (@RyanSeacrest) December 31, 2019
Bukod sa Pilipinas, nagpaabot din ng “Happy New Year” greetings ang 45-anyos na American Idol host sa iba pang mga bansa, gaya ng Australia, Korea, Japan, Spain, France, Italy, Brazil, at Hawaii.
Pero ang pagbati ni Ryan sa Pilipinas ang nakakuha ng pinakamaraming reaksiyon—siyempre pa, mula sa mga Pilipino.
At press time, mayroon itong 6,020 reactions, mahigit 1,000 retweets, at nasa lagpas 100 ang comments.
Ang mga nagkomento, pawang Pinoy na na-appreciate ang ginawa ni Ryan, at gumanti ng pagbati sa kanya.
Nag-perform sa New Year’s Rockin’ Eve sina Dua Lipa, Post Malone, Jonas Brothers, Green Day, at ang Korean pop idol group na BTS.
RYAN TWEETS IN FILIPINO
Hindi ito ang unang beses na nakakuha ng libu-libong reaksiyon ang tweets ni Ryan para sa mga Pinoy.
January 9, 2019, sa Twitter din ipinaabot ni Ryan ang pagbati niya kay Miss Universe 2018 Catriona Gray na katatapos lang koronahan noon.
Iyon ay matapos mag-guest si Catriona sa show nina Ryan at Kelly Ripa, ang Live With Kelly and Ryan, noong January 8, 2019.
Nakasulat din sa Filipino ang pagbati noon ni Ryan kay Catriona at sa mga Pilipino.
Saad sa tweet ni Ryan: “A lot of #FilipinoPride in the audience today for @MissUniverse @Catrionaelisa! Maligayang bati sa inyong pagkapanalo!”
A lot of #FilipinoPride in the audience today for @MissUniverse @Catrionaelisa! Maligayang bati sa inyong pagkapanalo! pic.twitter.com/7RfVaxk54T
— Ryan Seacrest (@RyanSeacrest) January 7, 2019
Ang tweet na ito ni Ryan ay mayroong 35,864 likes at 4,352 retweets.
LOVE FOR “PEOPLE OF THE PHILIPPINES”
August 7, 2012 naman nang ipinarating ng TV host-producer ang kanyang pagdamay sa mga Pilipino kasunod ng malawakang pagbaha sa Pilipinas dulot ng habagat.
Tweet ni Ryan: “From London to Manila, my thoughts are with the people of the Philippines. Stay safe. Stay resilient.”
From London to Manila, my thoughts are with the people of the Philippines. Stay safe. Stay resilient.
— Ryan Seacrest (@RyanSeacrest) August 7, 2012
Nagkaroon pa ng hashtags #BangonPH at #PrayForThePhilippines ang thread sa tweet na ito ni Ryan. Halos 3,000 ang likes at may 12,000 retweets ang tweet niyang ito.
Nang mga panahong iyon, pinatindi ng bagyong may international name na Haikui ang habagat, na nakakaapekto noon sa bansa.
Tatlong araw na tuluy-tuloy na bumuhos ang malakas na ulan, at nalubog sa baha ang buong Metro Manila at 17 pang probinsiya.
Mahigit 100 ang nasawi, at aabot sa isang milyong pamilya ang naapektuhan ng naturang trahedya.