"Oo nga, congrats, congrats!"
Ito ang nakangiting pahayag ni Rayver Cruz tungkol sa balitang mahigit isang taon nang engaged sina Sarah Geronimo at Matteo Guidicelli.
Si Rayver ay ex-boyfriend ni Sarah. Isang taon silang naging magkarelasyon, pero nauwi iyon sa hiwalayan noong March 2010.
Hindi maiwasang maungkat ang tungkol sa nakaraan nina Rayver at Sarah nang magkrus ang landas nina Rayver at Matteo kamakailan.
Isa si Matteo sa groomsmen ni Rodjun Cruz, na ikinasal kay Dianne Medina noong December 21, 2019.
Nasaksihan doon ang bonding nina Rayver at Matteo na matagal na raw magkaibigan.
Napag-usapan ba nina Rayver at Matteo ang tungkol sa napipintong kasal ng huli?
Sagot ng Kapuso actor, "Hindi naman kailangan pag-usapan. Pero kinongrats ko siya.
"For sure, invited ako dun. Si Matt pa! Pag in-invite ako ni Matt, a-attend ako."
Tukoy pa ni Rayver tungkol sa dating relasyon nila ni Sarah, "Ang tagal-tagal na nung ano, e. Parang dekada na 'yan!"
Nakapanayam ng PEP.ph (Philippine Entertainment Portal) at piling reporters si Rayver pagkatapos nitong sumalang sa All-Out Sundays, ang bagong Sunday variety show ng GMA-7, na nag-pilot telecast nitong January 5.
NOT AWKWARD AROUND MATTEO, SARAH
Wala raw ilangan kina Rayver at Matteo kahit pa naging ex-girlfriend ni Rayver si Sarah.
"Never. Kahit tanungin mo siya," ani Rayver.
Wala pa raw pagkakataong nakita niya si Sarah kasama si Matteo.
Pero diin ni Rayver, "Pero pag nagkita kami ni Sarah, okay naman.
"Huwag mo na lagyan ng... Matagal na yun, ang babata pa namin!"
Nang banggitin ng isang entertainment reporter na si Rayver ang nakilalang first boyfriend ni Sarah, natatawang umiwas nang magkomento ang Kapuso actor.
"Hay, naku! Andito tayo para sa All-Out Sundays.
"Gusto pa dagdagan, ikakasal na nga yung tao."
Ang mahalaga ay pare-pareho raw silang masaya sa kani-kanilang love life.
Bukas si Rayver tungkol sa pagmamahalan nila ng girlfriend niyang si Janine Gutierrez.
Pero aminado raw siyang mauuna si Matteo na lumagay sa tahimik.
"Sure ball 'yan!" hirit pa ni Rayver.
Usap-usapang nakatakdang ikasal sina Matteo at Sarah sa March 2020, base sa Twitter post ng DZRH kamakailan.
Tanging komento ni Rayver ukol dito, "Hindi ko pa alam, e.
"E, di magkita-kita tayo dun. For sure, malaki yung wedding."
RAYVER-MATTEO FRIENDSHIP
May ilang netizens ang nasorpresa sa bonding moments nina Rayver at Matteo, na parehong nag-post ng pictures nila sa dinaluhang kasal nina Rodjun at Dianne.
Pero maging sa 28th birthday party ni Matteo noong March 2018 ay namataan si Rayver na isa sa mga bisita ng Kapamilya actor.
Bago lumipat ng GMA-7 si Rayver noong 2018, nakatrabaho pa niya si Matteo sa ABS-CBN prime-time series na Bagani.
"Pero before pa yung Bagani, close na kami, kasi South Boys kami, e.
"Ang liit lang ng community sa South," tukoy ni Rayver sa tirahan niya sa BF-Homes, Parañaque City at kay Matteo na nakatira sa Alabang, Muntinlupa City.
"Way back, hindi pa siya artista... Race car driver si Matt, di ba? Magaling pa siya mag-go kart, kilala na namin siya.
"Mas naging close kami nung nakikita ko na siya sa same industry, kasi mas lagi mo na nakikita, e."
Bata pa lang si Rayver nang pasukin niya ang showbiz, hanggang sa pagbidahan niya ang ABS-CBN fantasy-drama series na Spirits noong 2004.
Si Matteo naman ay nagsimulang mag-artista noong 2007.