Hindi raw magse-celebrate ng kanyang birthday sa January 27 ang Wowowin host na si Willie Revillame.
Imbes na tumanggap ng mga regalo at mag-celebrate, ilalaan niya raw ang special episode ng Wowowin sa Lunes na iyon sa pagtulong sa mga nasalanta ng Bulkang Taal.
"Sabi ko, ba't ako magse-celebrate, nang marami akong kababayan na naghihirap?" pahayag pa ni Willie matapos niyang pumirma ng kontrata sa GMA Network para sa kanyang bagong show na Wowowin Primetime.
Ang Wowowin Primetime ang Saturday edition ng show niyang Wowowin na napapanood tuwing Lunes hanggang Biyernes.
Simula Pebrero hindi lang daw limang araw siyang maghahatid ng saya at tulong sa kanyang mga kababayan, kundi anim na araw na.
Ang anak ni Gary Valenciano na si Gab Valenciano ang direktor ng Wowowin Primetime.
"Yung Wowowin po at saka GMA, isa lang naman, di ba?
"Saya, ligaya, pag-asa, at pagmamahal. And I think yung tibok ng puso dito sa GMA, talagang tibok na tunay. Tibok na may pagmamahal para sa mga Pilipino, lalung-lalo na sa mga nangangailangan," dagdag pa ni Willie.
Matatandaang nakuhanan pa ni Willie ang mga unang sandali ng pagbuga ng abo at usok ng Bulkang Taal.