Nanawagan si Kapuso actor Alden Richards ng dagdag na tulong pa para sa mga nasalanta ng Bulkang Taal.
Sa report ng 24 Oras kahapon, January 22, nilibot ni Alden ang ilang evacuation centers sa Alitagtag at Mataas Na Kahoy kunsaan lumikas ang marami sa naapektuhan ng Taal Volcano eruption. Tubong-Laguna si Alden at marami raw siyang kakilala at mga kaibigan sa mga karatig na lugar.
Namahagi si Alden ng ilang food bags at sa kanyang maliit na paraan, sana raw ay nakapaghatid siya ng saya sa mga nalulungkot sa mga ganitong pagkakataon.
Pero panawagan ng tinaguriang "Asia's Multimedia Star," kailangan pa ng dagdag na tulong ng mga naapektuhan ng pagputok ng Bulkang Taal.
"Mahaba-haba pong tulungan 'to," ani Alden.
"Sana hindi tayo magsawa and we continue doing relief operations for the evacuees ng Taal, sa Taal area, especially sa Batangas.
"Sa mga gustong tumulong, sana i-ready pa natin yung mga gusto nating itulong sa kanila para tuluy-tuloy lang. Kasi nakita ko, e. I was there. Nakapunta ako sa different evacuation areas, kailangan pa nila ng tulong.
"Sana hindi matapos lang sa isang bigayan. We have to continue," dagdag-panawagan pa ni Alden.