Ibinahagi ng America’s Got Talent: The Champions judges na sina Heidi Klum at Howie Mandel ang video ng semifinals performance ng Pinoy singer na si Marcelito Pomoy.
Magkasunod na in-upload nina Howie at Heidi nitong Martes, February 4, sa kani-kanilang Twitter accounts ang video ng pag-awit ni Marcelito ng Andrea Bocelli classic na “Time To Say Goodbye.”
Ang naturang performance ni Marcelito, 35, ang naging susi upang makapasok siya sa finals ng international singing competition.
Bukod sa 2011 Pilipinas Got Talent champion, finalists din sa AGT sina Hans, Tyler Butler-Figueroa, Alexa Lauenburger, ang Sandou Trio Russian Bar, at ang Duo Transcend.
Sumikat si Marcelito dahil sa pag-awit niya ng parehong tenor at soprano sa duet songs. Nakatanggap siya ng standing ovation mula sa judges na sina Heidi, Howie, Alesha Dixon, at Simon Cowell dahil sa talento niyang ito.
HEIDI KLUM’S FAVORITE
Komento ni Howie, 64, ang pambato ng Pilipinas ang may “best shot of winning this whole thing.”
Pinuri naman ni Alesha ang song choice at ang “fabulous performance” ni Marcelito.
Si Simon, bagamat kinilala ang “unique, incredible, special talent” ng Pinoy singer, sinabi niyang kailangang paghusayan pa ni Marcelito sa finals “because the surprise is now over.”
Hayagan namang sinabi ni Heidi na si Marcelito ang paborito niya sa lahat ng contestants.
Sabi ni Heidi: “I've been waiting all day for you to come onstage.
“For me, you are my favorite.
“It just blows my mind.”
Ilang oras matapos umere ang America’s Got Talent: The Champions semifinals nitong February 3 (February 4 sa Pilipinas), ibinahagi ni Heidi ang videos ng mga contestants.
Caption ng 46-anyos na American-German supermodel sa video ni Marcelito: “Two amazing voices in on person … @marcelitopomoy8 THIS is what talent sounds like! #AGTChampions.”
Sa lahat, ang tweet ni Heidi tungkol kay Marcelito ang may pinakamaraming likes, na umabot sa 10,500, bukod pa sa mahigit 2,300 retweets, at lampas 100 comments at press time.
Karamihan sa mga nagkomento ay mga Pilipinong hopeful na si Marcelito ang mananalo at tatanghaling America’s Got Talent: The Champion.
May mga Twitter users din na nagpasalamat kay Heidi.
Gayunman, ang tweet na ito ni Heidi ay dinaig ng tweet ni Howie.
HOWIE’S TWEET GETS 21,000 REACTIONS
Mayroong halos 21,000 likes, mahigit 5,900 retweets, at aabot na sa 270 ang komento sa video ni Marcelito na ibinahagi ni Howie sa Twitter.
Caption ni Howie: “Have you heard his dual voices? Marcelito Pomoy did an INCREDIBLE job. WOW! #AGTChampions.”
Sa magkahiwalay na posts nina Howie at Heidi, ang video ni Marcelito rin ang may pinakamaraming views, na pumalo na sa mahigit 390,000.
Sa susunod na linggo na maghaharap-harap ang anim na finalists, laban sa apat na golden buzzer acts na sina Angelina Jordan, Boogie Storm, V. Unbeatable, at Silhouettes.