Nagbahagi sina Pops Fernandez, 53, at Aicelle Santos, 34, ng mga pagkakamaling naranasan nila habang nagpe-perform sa entablado—mapa-concert man o sa isang event.
Madalas kasing mapuna ang singers at performers kapag pumiyok, nagkamali sa lyrics, nadapa sa stage, o kaya'y nagkaroon ng wardrobe malfunction.
“That really happens,” bungad ni Pops nang makausap ng PEP.ph (Philippine Entertainment Portal) at iba pang reporters sa press conference ng upcoming Kapuso singing search na Centerstage, na ginanap noong Huwebes, February 6.
Pero aniya, ang tunay na sukatan ng pagiging professional performer ay ang maka-recover mula sa pagkakamali.
“I think that’s the best part of performing live—you never really know what’s gonna happen onstage.
“No matter how many times you rehearse, di ba, somehow may mga moments… hindi mo talaga siya mape-perfect.
“I think what makes a good performer is maski may mangyari na hindi tama onstage, hindi mararamdaman o makikita ng tao na mali iyon.”
Sa kaso raw ni Pops, maraming beses na siyang nabiktima ng wardrobe malfunction.
Lahad niya, “How many moments na hindi ako nakalabas, kasi hindi ko masara ang pagkahaba-haba kong boots.
“'Tapos may moment rin na sumasayaw ako, siyempre nagpapa-sexy ako, makipot ang leather pants ko, pumutok yung likod. No joke iyan!
“But you have to continue, because the idea of a live performance is your audience shouldn’t know what’s happening onstage, so it’s nakakatakot.
“But at the same time, that’s the challenge.
“Pag nandoon, you yourself as a performer, mag-iisip ka na, ‘Ano bang gagawin ko?’
"Habang kumakanta ka, ‘Ano bang gagawin ko? Papa'no ko ba hindi ipapakita iyon?'
“Ako, nadapa na so many times, nakalimutan yung lyrics…"
Sabi pa ni Pops, “Iyon na nga, that’s the test of a true performer and that is the beauty of a live performance."
AICELLE ON MISTAKES, MISHAPS ONSTAGE
Ang kapwa Centerstage judge ni Pops na si Aicelle Santos ay binalikan din ang mga pagkakamaling nagawa niya sa entablado.
“Naaalala ko lang yung nakalimutan yung lyrics!” natatawang kuwento ni Aicelle.
“Alam niyo po, nababansagan na rin akong 'composer' paminsan-minsan.
“Mag-iimbento na lang ako...
“Pero pagbaba ko, sasabihin ko, ‘Grabe, ‘no, alam mo, mali-mali ang lyrics.’”
Mabuti na lang daw at hindi nahahalata ito.
“Sobrang sarap sa puso na hindi halata yung pagkakamali.
“Meron nadapa din, 'tapos tuloy pa rin ang pagkanta mo habang unti-unti kang tumatayo.”
Sabi pa ni Aicelle, “Alam mo, yun ang pinakamalalakas na palakpak ko, habang tumatayo.”
Ano ang natutunan nila kapag nagkakamali habang nagpe-perform?
Ani Aicelle, “Siguro natutunan ko doon, you have to forgive yourself. Tapos na iyon, e.”
Dagdag ni Pops, “Tsaka tao lang naman, di ba?”
Kasama ring judge nina Pops at Aicelle sa Centerstage ang musical director na si Mel Villena.
Ang main host ng programa ay si Alden Richards at co-host si Betong Sumaya.
Magsisimulang umere ang Centerstage sa GMA-7 sa February 16.