Kanya-kanyang diskarte ngayon ang mga mayor.
Ito ay dahil mahirap talaga ang pagkilos sa buong Metro Manila dahil sa enhanced community quarantine.
Bukod pa rito, may 8p.m.-5.a.m. na curfew na ipinatutupad sa ilang siyudad.
May mga Metro Manila mayor na mas pinupuri. Maayos daw ang pamamalakad sa kanilang lugar ngayong may COVID-19 pandemic.
Kabilang dito sina Makati City Mayor Abby Binay, Marikina City Mayor Marcy Teodoro, Manila Mayor Isko Moreno, Pasig City Mayor Vico Sotto, at Valenzuela City Mayor Rex Gatchalian.
Sa social media, kadalasang nagti-trend si Mayor Vico dahil pro-active ito sa kanyang ginagawa sa Pasig.
Kamakailan lamang ay inilunsad ni Mayor Vico ang Mobile Palengke.
Layunin nitong ilapit sa mga kababayan ang mga bilihin sa palengke sa parehong halaga, dahil nga naman halos walang pampublikong transportasyon at mahirap pag nakukumpulan ang mga tao sa iisang lugar.
Limang Mobile Palengke sa ngayon ang umiikot sa lungsod ng Pasig.
Sa Twitter, may netizen ang nagtanong kay Mayor Gatchalian kahapon, March 26, kung maaari ba silang maglunsad din ng Mobile Palengke sa Valenzuela.
Saad ni @gettcrble97: “@rex_gatchalian Hi mayor, kung sakali pwede rin po kaya tayo magkaroon ng Mobile Palengke?
“Maraming salamat po and Godbless, Ingat po kayo lagi”
Kaagad namang sumagot si Mayor Rex.
Tugon niya: “Plano nga natin gayahin sila sa pasig sa pamumuno ni mayor @VicoSotto.”
Dagdag pa ni Mayor Rex, sa panahon ngayong nakararanas tayo ng kakaibang laban sa virus, hindi na mahalaga kung masabihan siyang nangongopya sa iba.
Aniya, “Kopyahan na eto!!! Wala naman tayo sa school eh...in this case copying is allowed i think.”
Kinaaliwan naman ng netizens ang mga plano at sagot ni Mayor Gatchalian.